Thursday 7 May 2015

Antichrist Nih Mi Hlengtu Ah A Hman Mi: Naal Prophet


Biadomhnak: 

Kan hnulei ah "Antichrist" Timi Hi Hodah A Si? Zeibantuk Dah A Si? timi kan zoh cang khah! Kha, Antichrist pa nih khan a party ah mi tampi an luh khawhnak hnga, biaknak lei in minung pakhat hman dingmi a ngei. Cucu Naal Prophet (or) the false prophet, tiah Baibal nih a auh. Kan Baibal chung thil umtuning a langhning ahcun, antichrist timi pa hi ramkhel (politic) leikap in sidawh a si. Sihmanhsehlaw vawlei cung dihlak uktu ding a si caah, ramkhel leikap cawlcanghnak lawng in a rian a tlinh kho lai lo. Cucaah, biaknak vawlei hip piaktu dingah, bawmtu minung pakhat Naal  prophet a ngei lai, tiah kan Baibal nih fiang tein a chim. Hi hna pahnih kutsih in rian an tuan khawh hnu ahcun, vawlei cung minung cu  an duh zongah duh lo zongah, an kut tangah an um  a hau cang lai: cucu Baibal cawnpiakning in, Satan saduhthah cu a si!

Ramkhel vawlei in a rak chuak dingmi antichrist kong ah hngalh fiannak ngeih kan herh kan ti cang bantuk in, biaknak lei in a hung chuak dingmi Naal prophet pa kong zong ah hngalh fiannak ngeih kan herh ve. Cucaah, "The False Prophet" timi  hi hodah a si? Zeibantuk Dah A Si? timi hi tutan cu kan zohti tuah hna lai.


Ni Donghnak Naal Prophet Kong Kan Hngalh Khawh Tawk 

 Baibal based: (Biathlam 13:11-12; 19:20)

1. "Tufa bantuk in kii pahnih a ngei lai": Baibal chung hmun tampi ah Jesuh Khrih hi "tufa" he tahchunh a si. A sullam cu nidonghnak ni Satan hman mipa, Naal prophet hi a hung chuah tikah, vawlei cung misual khamhtu Jesuh Khrih muisam in a hung chuak te lai, tinak a si. Tihnung ciapi in a chuak lai lo! Baibal nih "tufa kii" a timi hi, lu cung i kii vaa bunh khi a chim duhnak a si lo. "Kii" timi cu nawlngeihnak (or) thawnnak hmelchunhnak a si.  

Matthew 7:15 ah Jesuh nih, "Naal prophet pawl an rak chuah lai caah i ralring u. An nih cu tufano bantuk in nan sinah an ra lai sihmanhsehlaw an lungthin cu cenghngia bantuk an si" tiah a rak ti bantuk khan a si te lai. Tufano bantuk i aa umternak hlennak caah hmang in, mizapi a hlen te hna lai.

2. "Satan bantuk in bia a chim lai": Satan bantuk in bia a chim lai, timi a sullam cu a cung nawl ngeitu pa Satan duhnak bia lawng a chim lai, tinak khi a si. A bia chimpiaktu Satan nih minung lungthin chungah, a bia chimmi cu hmual a ngeihter lai. Biaknak lei in a hung chuak fawn ttung, zeitindah Satan bantuk i bia a chim ahcun mizapi nih an zulh duh lai, kan ti khawh men. Sihmanhsehlaw Satan cu zeitikhmanh ah biaknak a dohmi a si bal lo. Biaknak i a chungmuru thawnnak tu a dohmi a si zungzal. Pathian biaknak hmun ah um ko ttung in biaknak kong taktak ruat bal ttung loin mi va tuah aa tim mipa a si. 

Hi kaa zawn teah ahhin, nihin Khrihfa hruaitu tampi zong Satan nih a kan thluk lengmang hi mu. Ni donghnak Naal prophet cu biaknak chung ah hruaitu minthang a si hnu ah vawlei thisa lei in kan ruah-tuak a herhmi thil kong lawngte a aupi i a dirpitu a si te lai (Rev. 17). Cucaah zapi cu a hloh te ko hna lai.

3. "Naal prophet nih Antichrist nawlngeihnak a hman lai": A sullam cu, hi pa hi mi vialte nih mi cungnung le zulh awk tlak ah an ruah i an zulhnak hnga, antichrist nih nawlngeihnak a pek lai i amah aiwah in a cawlcanghnter lai, tinak khi si.

4. "Naal prophet nih miphun vialte cu antichrist a biakter dih hna lai": Hihi aa tinhmi le a rianttuanmi phichuak cu a si lai. Hi rian lim khawhnak caah a hmanmi hriamnam cu Satan sin in a hmuhmi biachim khawhnak le antichrist sin in a hmuhmi nawlngeihnak hna hi an si lai.

II Thessalon 2:9  ah kan hmuh bantuk in, atu kan chimmi Naal prophet le antichrist hi kum sarih harnak chungah thil khuaruahhar phunzakip tuah khawhnak thawnnak pek an si lai. An kaa in an chimmi kha, an tuahsernak in an fehter lai i an thil tikhawhnak cu an nawlngeihnak nih hmual a ngeihter. Cucaah, a min men zumtu pawl caah cun, an kut chung in luat khawhnak lam a um ti lo. 

Kan ruahchih dingmi cu hi hna pahnih nih vawlei cung hi bantuk in rian an ttuan hi mithianglawr (rapture) dih hnu ah a si lai. Mithianglawr hmanh ah aa tel kho deuh ve lomi caah cun, hi hna pahnih hmai ah mitampi tanhtu a ngei ti lomi Jesuh min va ttanh i a caah ka nunnak ka pek lai, va ti khawh hi cu thil harsa ngaingai a si. Sihmanhsehlaw hi lio caan ah zungzal nunnak co khawhnak lam um chun cu, Jesuh Min (zumhnak) ruangah thihnak (martyr) tuar lawng a tang cang ai lai. Hi kaa ah khin cun, khamhnak hmuh khawh a si lo, ti tluk khi si ko cang! 

Hoi dawt hna atu hi, Jesuh tanhtu le zumhnak lei karhlannak ah hiptu tampi kan ngeih lio caan le awlte in khamhnak kan co khawh caan a si. Nihin hi kan caah khamhnak hmuhnak caan tha a si. 

Khamh hnangamnak na ngei cang maw?

Ruah awk: Biaknak lei ah, hruaitu kan si cuahmah buin Satan nih mihlengtu ah a hmanmi (Naal prophet bantuk) si khawh a si.