Sal Si Nak Cha Cun, Thih An Duh Deuh!

Rom ralkap nih A.D 70 ah Jerusalem biakinn an hrawh i Jerusalem khuapi chung ummmi Judah miphun tampi sal ah an rak tlaih hna. Sihmanhsehlaw Judah miphun, nu he pa he minung 967 cu Herod the Great nih ral-kut in zamnak ca i, rili thi (dead sea) kam te ah a rak sakmi hmun-him "Masada" ah an rak zam. "Masada" cu lungzum zum lawngte in a khatmi tlangpar ah sak a si leng ah, zei bantuk ral hmanh kai kho lo ding in, kai-dawn sangpi pi in kulh dihmi siangpahrang innsang a si.

Hi hmun ahhin, minung thong tampi hman awk za in hriam-nam an chiah, kum tampi ei awk za in rawl zong an chiah dih. Tlang tang in, minung umnak tlangpar tiang kainak caah minung pakhat tlum tete lam pathum lawng a um i zei bantuk ralkap buu ngan nih an doh hna zong ah minung pathumli leng voikhat ah kai khawh a si lo caah dohnak lam a har ngaingai.

Hi kaa hmun lawng ahhin, Sal ah tlaih rih lomi Judah miphun an tang cang ti an hngalh caah, Rome ralkap nih an kulh. Tlang kam in, tlang dang an i ser i April 16, AD 73 ah Rome ralkap cu tlangpar tiang an kai kho ai. An duh zong duh lo zong ah, misual Rome pawl sal tang ding an si cang caah, an hruaitu Eleazar ben Ya'ir nih a tanglei bantuk hin bia a chimh hna:

"Upatmi ka miphun hawi hna, hlan liopi in minung siloin Pathian lawnglawng rianh ding in lungthin aa thlek cangmi kan sinak cu, kan tuahsernak in langhter caan a phan cang.  Kanmah hi luatnak caah dohnak thawktu zong kan si bantuk in hi lungretheihnak a donghtertu zong kan si lai. Ral nih an tei i sal ah an tlaihmi hna bantuk siloin ho sal hmanh tang lo tein, upatnak he a luatmi minu/mipa dirhmun in thihnak caan ttha kan hmuhmi hi Pathian laksawng a si ko tiah ka ruah.

Cucaah kan nupi le kan fale hi sal tang loin thi hna sehlaw, kan mah zong khat le khat zaangfahnak i tuahpiak hna u sih. Sihmanhsehlaw kan thih hlan ah kan ngeihmi thilri vilate hi Rome ralkap caah lak awk um loin, kan khanh ta dih lai. Kan ral hna nih, rawl ei awk ngeih lo ruang ah an thi tiah an ruah sualnak hnga lo le anmah an sal tuannak in thih an duh deuh caah an thi tihi an hngalh khawhnak hnga, kan rawl chiahnak buk bal cu kan khang lai lo" tiah a ti hna.

Cu hnu ahcun camcawh fung in minung 10 an thim hna i cu 10 hna nihcun, a dang vialte cu vainam in an thah dih hna. Cu hnu ah, cu 10 hna lak ahcun minung pakhat an thim tthan i cu pa nihcun a dang 9 cu a thah hna. A donghnak ah cu pa cu amah le mah aa that ve!

Anmah lak ah, thih a ttih tukmi nu pahnih le ngakchia 5 cu tikhor car ah an rak i thup caah thi loin an luat i cu hna nihcun hi a cangmi thil vialte hi Rome ralkap sin ah an chim dih. Cu cu, nihin zong ah thilsining kan theih khawhnak hi a si.

Cucaah hi hmun "Masada" hi nihin ni tiang Judah miphun nih "an luatnak hmelchunhnak" caah an hman i Isreal ralkap poh nih ralkap training an dih i ralkap rian taktak tuan an thok lai te ah , hikaa hmun ahhin an training petu bawi nih a hruai hna i "Masada cu ral kut ah a tla ti lai lo" (Masada shall not fall again) tiah biakamnak an tuah zungzal.

An nih nihcun, midang sal tannak cha cun, thih an duh deuh! Pathian sal si dah ti lo, zei sal si hmanh an duh lo caah nunnak tiang an pek!

Kan nih tah, zei sal ah dah kan tan?

Zuu sal, kuat sal, sadah sal, tha-thut sal, bia duh sal, nupa sualnak sal, thin tawi sal le phunzai sal hna ah kan tan peng ve rih sual ahcun hi tuanbia nih hin kan cawnpiak seh!

Pathian sal ttuan cu Sual sal in, nitin nunnak ah luat hi a si ko!

Khrihfabu Founder le Founder Pa Saduhthah

Kan Lai miphun lakah, "Church Founder" kan tam ngaingai..

Jesuh nih zeitindik a hei ruah ve hnga? Baibal cawnpiakning ahcun "Church founder" cu Jesuh lawnglawng a si awk a si ko! Cucaah Zei bantuk minung hmanh nih, "Church founder ka si" timi bia hi kan hman ngam awk a si lo!

Kan mah Buu sawhsawh kan dirh ahcun "founder" kan i ti zong ah a poi lo; sihmanhsehlaw Khrihfabu (Church) kan dirh ko ahcun "hohmanh nih founder ka si" kan i ti ngam awk a si hrimhrim lo!

Baibal Sianginn, Ngaktthah sianginn le a dandang cu "founder kan si" ti zong ah a poi lo; nain Khrihfabu founder ka si, ti cu ning hngal bia a si!

kan Lai miphun lak ah, 'Church Founder ka si' ti duak zau in amah duhning poh in Pathian Khrihfabu a kalpitu hruaitu kan tam pah. Tteng-nge Khrihfabu vialte nih Jesuh mithmai zoh loin an "founder" mit-hmai lawng zoh hau in a ummi, mah ser-chawm "church founder" kan tam ngaite.

"Thlarau kan founder cu, Jesuh a si ko. Kei cu vawlei nan founder lawng ka si" tiah an member an hlen hna. Vawlei founder le van founder a um lo; Church founder cu Church a umnak poh ah Jesuh a si awk a si ko.

Zeicatiah 'Founder' timi cu "ngeitu" tinak a si caah "ngeitu" nihcun a ngeihmi cungah nawlngeihnak a ngeih zungzal ko lai. Minung founder nihcun minung nawlngeihnak hman an i tim peng lai i founder Jesuh nihcun Thlarau nawlngeihnak hman a timh zungzal ve ko lai.

Cucaah Khrihfabu ah Jesuh lawng kan founder si ko seh. Khrihfabu kong ah porhlawt awk kan ngeih ve sual nak hnga lo, kan nih cu "ngeitu" siloin "tuukhal (or) zohkhenhtu" tu si dih ko u sih.

Khrihfabu ngeitu pa, Jesuh nih zeisaduh dah a thah?

Matt. 16:18 kan rel tik ah, Jesuh nih "Ka Khrihfabu ka dirh lai" (I will build MY Church) tiah a ti. "Ka ta" timi biafang a hman bak!

Jesuh nih hi bia a chimnak hmun hi, Jerusalem ah a si lo. Judahmi puanzar thlam chung zong ah a si fawn lo. Kha lio caan i khuachia le khuavang riantuannak in a kahnak hmun, Caesarea Philippi ah a si.

Caesarea Philippi hi "Pan" timi pathian biaknak hmunlipi a rak si.

"Pan pathian" cu a hrap-cheu meheh, a hrap cheu minung a simi pathian a si. A zumtu hna nihcun, hi pathian hi Caesarea Philippi ah aummi lungkua nganpi chung in a chuakmi a si, tiah an zumh. Vawlei chung in cu lungkuapi a kaa zawn cun tiput nganpi a chuak. Cu tiput chuahnak awngkua cu hlan liomi nih a thuh-puanh an tah khawh lo caah, a thuk bikmi Hell in a chuakmi a si an ti i Hell kutkaa (gates of hell) tiah an auh.

Cu lungkuapi velchum ahcun pathian phun zakip, Baal pathian tbk. biakinn pa hleili an um i Pan pathian biami siseh, Baal pathian le pathian dangdang a biami hna cu an dihlak in hi hmun aahin sualnak phunphun an tuah; nupa sualnak le rit-ngatnak phun zakip dong loin an rak tuahnak hmun sual khalipi a rak si.

Hi kaa hmun thengte hin, Jesuh cu a dir i "Hi lungcung ahhin Ka Khrihfabu ka dirh lai" tiag Khrihfabu dirhnak ding kong a chim.

Hi kaa zawn ah "Lung cung" timi hi sullam kap-hnih a ngei tiah Baibal thiamsang pawl nih an zumh: 1. Lungpi a simi anmah Jesuh Khrih cung ah ka dirh lai, tinak a si. 2. kha bia a chim lio i Jesuh Khrih a dirhnak hmun sualnak phun zakip an tuahnak lungpi cung, tinak zong a si chih tiah an ti.

Cucaah Khrihfabu taktak i kan rian cu, Khrih thawnnak hmang in Sualnak in a khatmi vawlei, horduhcuainak in a khatmi kan kiangkap minung le miphun hna zohchun awk nunzia dawh chiah hi a si ko. Sual ral doh le Satan nih bawi a tuannak khua, chungkhar le minung hna Khrih thawnnak hmang in luater hi Khrihfabu kan rian a si.

Khrihfabu cu biakinn hi a si lo; zumtu pumpak cio hi Pathian Khrihfabu kan si. Cucaah kan umnak kip ah zumtu pumpak cio nih, Bawipa nih a ka fialmi a si, tiah kan ruahmi thil ttha poh atu bak ah tuah cio i zuam yna u sih.

Atu kum Febuary thla donghnak zarh i thla ka cam lio ah, "Mizaw taktak cu zapi Pathian thangthatnak hmun, biakinn ah an chuak ti lo" tiah Pathian bia a ka ruah.

Cu caan thok in, biakinn ah arak chuak kho rihmi hna lawng cawnpiak cu ka di a riam kho ti lo. Bawipa nih lam a ka awn-piak i inn kip home crusade ka tuah. Bawipa nih a herh a tinak zawn ah thluachuah a pek i sual ah i a tang cangmi hna nih luatnak an hmuh tikah, lung lawmhnak in ka khat.

Lawmhnak in khah ve na duh ahcun, Bawipa nih a fial ko tiah na ruahmi thil poh kha atu bak ah tuah zungzal law naa nuam zungzal ko lai.

Hohmanh Nih "Keimah nih Tuarning" An Ti Bak Lo!

Nai ah US ram, Laimi zong tampi an umnak Chicago in Kentucky lei ah zuan aa thohmi United Airline vanlawng cung in Dr.David Dao cu a hmai haa fang hnih tlong lak le a hnar kuai lak in hlawnh a si.

Vanlawng tthutden a ummi nak in, Vanlawng tikect a cawmi pali in an tam deuh caah, minung pali 4 cu a hnu deuh a kal dingmi vanlawng nan hngah a hau, tiah nawlngeitu nih an ti hna. Keimah nih ka hngah lai, a timi cu hotel an riahnak vialte liam piak dih leng ah, $400 pek nan si lai, tiah an ti hna. Sihmanhsehlaw hohmanh nih "keimah seh" an ti lo caah $800 pek nan si lai, an ti tthan hna nain hohmanh nih an duh hlei lo. Cucaah nawlgeitu nih cam-cawh fung an tuah i cam-cawh fung nih a tlakmi poah kirter ding in an thanh. Vanchiat ah , Dr.David Dao cu kirter ding ah aa tel ai. Sihmanhsehlaw "kir awk ka ttha bak lo" tiah a al hna caah nawlngeitu nih cei lak an velh i a tthutnak in hramhram loin an hnuh chih!

Kha thil a cangmi kong ah, Dallas ah mirang Pastor pa Dr. David Dykes nih "an hnuh chihmi nak in khuaruah har deuh a simi cu, vanlawng chung minung kha vialte lak 'khah, keimah tu kir deuhning...kha tarpa kha fahnak pe hlah u, a ai-ah keimah ka kir lai" a titu pakhat hmanh an um lomi kha a si" a ti.

A mak ngai ko, Mirang cu vawleicung miphun vialte lak ah, dawtnak, zaanhfahnak le zawnruahnak ngei kho bik ding ah ruah an si nain, an zawn chuak a si ve lem lomi, midang tuar ding a si komi thil har ngaingai ahcun, midang aiawh in "keimah nih tuarning" ti cu an rak ngamh ve hrimhrim lo.

Baibal hmanh nih "mi ttha ca ahcun thih ngamh zong an um kho men nain...." (Rom. 5:7) tiah a ti. A sullam cu, mi ttha lo le misual ca ahcun hohmanh nih thih an ngamh lai lo, tinak a si.

Kanmah cio zong nih, kan zawn chuak le intuar lo awk ttha lo a si lem lo ahcun "midang aiawh in fahnak le thihnak tiang va tuar cu kan ngamh cio lai lo cuh..

India ram ahcun, Laimi kan hawi le nih "Mawtaw lam phiat/tan i Kala pakhat tal i phenh awk an um lo ahcun hna a ngam lo" tiah capo biatak bantuk in an ti tawn.

A sullam cu kan mah thihnak cun Kala thih cu kan duh deuh zungzal ko tinak a si! Hihi minung vialte nunzia a si.

Sihmanhsehlaw Jesuh nihcun, amah sual man intuar awk pakhat hmanh a ngei bak lo nain "misual le a sual cuahmah komi nangmah le keimah caah a nunnak a pek. Vawlei misual khamhnak ding caah zeidah kan tuah lai, hodah a nun aa pe lai? tiah Pa, Fa le Thiangthlarau vancung i meeting an tuahnak ah Jesuh nihcun "Keimah seh, keimanh nih tuarning" tiah a ti.

Hi bantuk in Misual kan caah a thihnak ngamnak hi ruang pahnih a ngei:

1. Ruang ngei loin Pathian nih a kan dawt tuk ruang ah a si.

John 3:16 ah "Pathian nih vawlei (misual nangmah le keimah) hi a kan dawt tuk hringhran caah a fapa ngaih chun a kan pek" tiah kan hmuh. Cu a kan pek cu "misual nih Khrih zumhnak thawng amah Pathian muisam kan ken tthan khawhnak hnga caah a si.

Rom Cakuat 5:8 "Asinain Pathian nih cun zeitluk in dah a kan dawt kha hitihin a langhter: kannih cu misual kan si ko rih lioah hin Khrih cu kan caah a thi".

Ruang ngei lo dawtnak, kan tlak ruang ah siloin a kan dawt hrimhrim ruang ah a fapa nunnak pek in Pathian nih a kan khamh!

Zeiruang ah dah hi tluk luammam hin Pathian nih a kan dawt? Nangmah le keimah dah ti lo, Pathian muisam keng in sermi an um lo! Pathian muisam kan ken caah, kan mah lawnglawng hi Pathian sunparnak langhter kho tu ding kan um. Cucaah kan nih misual pawl, sual chung in luater amah sunparnak petu ding ah sertthan a kan duh caah a fapa nunnak tiang a kan pekak hi a si!

2. Ruang ngei loin Jesuh Khrih nih a kan dawtnak ruang ah a si.

Johan 15:13 "Mi nih a hawile caah dawtnak ngan bik a ngeih khawhmi cu an ca i a nunnak pek hi a si".

Jesuh nih kan caah a nunnak a pek mi hi, zeidang thil ruang ah a si kho lo; dawtnak ruang lawnglawng ah a si ko!

Hi tluk dawtu pa dawtnak hngalh le i fian cang hnu ahcun, mah duhzawng in sual chung ah nun ngam asi ti lo! Dawtu pa duhning nun hi kan rian ngan bik a ai ko cang..

Bawipa nih thluachuah in pe hna seh...

Zumhnak ah nan unau,

Hrambik Lian

Ngaihthiamnak Nih kanmah Lungthin tu a rak lawmhter deuh!

Nai zarhpi Ni ah, Pu Robert Godwin cu kan Laimi zong tampi an umnak Ohio State, Cleveland lampi a kal lio ah, tlangval Steve Stephens nih meithal in thi lak a kah!

Steve Stephens nih Robert Godwin meithal in a kah hlan deuh ah video a zeih i fakpi in "Joy Lane," tiah a auter hmaisa hnu ah meithal in a khah i cu video cu mi vialte zoh awk in facebook ah a thlah!

"Joy Lane" cu Stephens darling tthing a si. A sullam cu Stephens nihhin a darling tthing "Joy Lane" ruang ah Robert hi a thah, tinak a si.

Mivialte nih cu video cu an zoh tikah, an ngaih a chia i an lung a fak tuk cio. Micheu nih a kaptu pa Stephens an mawh chiat i micheu nih nungaknu Joy Lane an mawhchiat ve. Cheukhat hna nihcun, nungaknu (Joy Lane)  cu "a sual tuk, thah ding a si ve, ka thah lai"..tiah a phun phun in an mawhchiat.

A thah hnu nihnih nak (18-April) ah a thattu pa Stephens cu amah le mah aa that ve!

A darling tthing Stephens a thih Ni ahcun, nungak Joy Lane nih thah a tongmi Pu Robert fanu le pathum a va ton hna.

Bia ttha ttha an rak ruah i a fanu le pathum nih amah Joy Lane tu cu an rak hnemh lehlam! An pa tthattu cung i an lungput an hmuh hna tik ah, CNN media an khuaruah a har i, "Ziah, a cung ah nan thin a hung lo maw?" tiah an hal hna.

An nih nihcun "nungak nu cung ah siseh, a thattu Stephens cung ah siseh, zeihmanh lungfahnak le thinhunnak kan ngei bak lo zeica tiah kan pa nih rian fakpi in ttuan a herhning, Pathian kan dawt awk a sining le midang kan ngaihthiam peng hna awk a sining ttha tuk in a kan cawnpiak caah kan ngaihthiam dih ko hna" tiah an ti.

Zei ruang lo ah kan pale mi nih that hna sehlaw, zeitluk in dah kan lung a fah i kan thin a hei hun hnga? Ruat ve hmanh!

An lung a fah lo cu si hin lai lo; an ngaih chiat lo zong si hrimhrim lai lo!

Lehrulhnak nih zei thil ttha hmanh a chuahpi loning le Bawipa nih Hell tlaktlak sualnak hmanh a kan ngaihthiam ahcun, zei ruang dah kan ngaihthiam hna lai lo? timi lungput an ngeih caah a si ko!

Khah, "ka ngaihthiamnak nih a zo ti lo eeh, voitam tuk ka ngaihthiam cang, ngaithiam awk a ttha lo, a luan tuk cang" kan ti tawn khah!

kan dirial cikcek in mi kan ti le kan tthuat tawnmi hna kha a rauh hlan ah mihmai kan khap lonak ah an i cang tawn ko lo ma kha?

Ramri a ngeimi ngaihthiamnak cu ngaihthiamnak a si lo!

Khrih nun a ngeimi hna cu, Thinhun awktlak tlak bak ah kan ruahmi thil kan ton i cei lak in kan tthuat hna, an hmual kan phoh hna i biachia phun tling in kan ti ve hna caan zong ah kan lung aa nuam kho bal lo; kan thil tu a rit chinchin!

Cucaah ngaihthiam timi hi Midang ca siloin kan mah lungthin nuamhnak caah a rak si ai. Duhtawk in midang va tthuat cu mah le mah lungre i theihter a si. Keimah tu lung nuam loin umning law midang tu lung nuam in um hna seh ti he aa khat! Mah nak in midang dawt deuh zong a si fawn!

Midang ngaihthiam nak in ngaihthiam lo ahhin kanmah kan cei deuh tawn!

Midang nak in nangmah naa dawt deuh ahcun midang va ngai thiam peng hna...

Kan fale caah midang ngaihthiam nun kan ngaihmi cawn awk tlak a si lai maw?

By

Hrambik Lian

Iron Rose Media Lutlai Pa Nih Mi Nupi Cia A Si A Hngal Hnga Lo Maw?

Kan hnuzarh ah Rengon hrambunh Zarhtin chuak, Iron Rose thawngzamh lutlai Ko Wai Yan Heinn cu amah zung cia te ah, thah a si. A ttang, a paw le a paang hrawng ah voi 15 bak nam in an sawh!

Hi bantuk in voi tam tuk nam in an sawh, an nolh chihmi zoh tik ah, a thatu nih thinhun bak in a thahmi a si ti a fiang!

Hi pa hi Kawl ralkap bawi tthatlonak kong ttial tawntu a si caah, kawl ralkap he aa pehtlaimi pakhat khat kut a si rua, tiah ruah cio a si!

Sihmanhsehlaw palik nih biaktak tein an hun hlat tik ah, a thattu cu Singapore hrambunh Shipping Company pakhat ah riansang ttuanmi U Aung Ko Ko a rak si ai.

Khah, U Aung Ko Ko nih a thahnak ruang cu hiti hin a chim: "Ko Wai Yan Heinn nih ka nupi a duh, facebook in a chawnh peng, kan inn zong ah a len, hotel ah a kalpi i keimah ka ttin poah ah a zam. Cu bantuk in ka nupi a duh caah ka thah ko" tiah palik sin ah fiangte in a chim.

Ruah awktlak ngaimi pakhat cu, "Hi thawngzamtu pa, Ko Wai Yan Heinn nihhin a duhmi nu kha pasal ngei cia a si a hngal hnga lo maw?" tihi a si.

Thawngzamhtu cu midang nih hngalh lomi hmanh a hngaltu an si! Thil thli-thup le innkhaan chung cawlcanghnak kong ah a thei khotu an si caah pasal ngei cia a si hi a rak hngalh tuk hringhran ko lai!

A si ahcun, ziah pasal ngei cia cu a duh?

Pasal a ngeih cang a hngalh lo ruang ah siloin "hngalh bu tein, lungfim tein" a duh hramhram mi khi a si ko!

Mi nupi cia duh cu thil tthalo a si zong a hngalh dih ko bu in, a ttha lo tiah a hngalh komi kha lungim tein tuah aa thi hramhram khi a si ko.

Hi pa hi misual tuk ah kan ruah khawh men..

Nifatin kan nunnak ah, thil ttha le thil ttha lo cu fiang tuk in kan hngalh dih ko nain kan nih zong nih "thil ttha lo" tuah kan i thim peng ve ko hih!

Hi pa bantuk mi nupi le mi pasal a si ko ti hngal ko bu in, facebook, viber,online le offline in mi duh a hmang Laimi zong kan tam tuk cang!

Zuu din a ttha lo, ti kan hngalh ko nain kan ding peng ko hih! Kuak zuk, sadah hmuam nih mintthatnak a chuahpi bal lo ti kan hngal ko bu in kan tuah peng ko hih! Bia duh, fir, mi chiatnak kong ceih le mi le mi karlak buainak chuahter cu an tthat lo kan hngal ko nain tuah kan i thim peng ko hna hih mu..

Kan hngalh lo ruang ah kan tuah sualmi siloin hngal bu te le lungfim tein kan tuahmi a si caah zeibantuk dantatnak poah kan i phu ko! Kan tuh bantuk cio in vawlei zong ah kan zum lai i van zong ah kan zum dih ko lai..

Pathian duhmi le thil ttha zeidah ti vial hngalh dih ko ttung i a ttha lomi tuah aa thim pengmi cu Pathian he hawikom an si kho lo; Pathian he an i tthen!

Pathian he aa tthenmi cu:

1. Thil ttha lo a simi zuudin, kuakzuk, biachia chim, mi nupi/pasal duh piak le mihmual phoh ah an ral a ttha i Thlrau lei a simi thlacam, thawngthachim le thangthatnak hla sak ah an ral a chia!

2. Hi hi cu thil ttha lo a si, tuah hlahning, ngol cangning an ti ve tawn nain sual teitu Khrih Thlarau an ngeih lo caah tuah lo in an um kho taktak bal lo, an ngol kho lo; an mah zong nih duh lomi thil ttha lo tuah peng sal ah an tang!

Hi bantuk minung cazin ah naa tel ve sual ahcun, na herhmi cu "Khrih Thlarau co" lawng a si! Kaa zum ning a tthat deuh lo caah a si lai, fak deuh in kaa zuam rih a hau timi men lai. Nain Khrih Thlarau na co hlan lo poah, mah ti khan na si peng ko lai!

"Sihmanhsehlaw nannih cu cuticun nan nung lo; Thlarau hruaining tu in nan nung deuh —Pathian Thlarau a ngei lomi cu Khrih ta an si lo. Sihmanhsehlaw Khrih cu nan chung i a nun ahcun sualnak ruangah nan pum cu thi hmanh hna seh law nannih cu Pathian he nan i rem cang caah Thlarau cu nan caah nunnak a si" (Rom. 8:10-11)

Bawipa Nih thluachuah in pe hna seh...

Nan unau,

Hrambik Lian

Phone Sal Kan Tam Cang Rua!

Thiamsang pawl nih tuchan minung nih Phone kan hmanning, cit-hlatnak an tuah i an hmuhmi cu hihi a si:

"Pa zatuak 46% nih zingkaa an thawh sin, ihkhun in an ttum hlan ah Phone an tawng hmaisa i Nu zatuak 55% nih zingkaa ihkhun in an ttum hlan ah Phone an tawng hmaisa" tiah an ti.

Nu he Pa he kan dihlak zatuak 65% nih kan ih hlan ihkhun cung ah Phone kan tawng ti a si.

Vawlei cungpi huap in an tuak tik ah, minung pakhat nih nikhat ah suimilam 5 hrawng hi Phone kan tawng ti a si. Hihi phone a tawng bal lomi nupi papi le ngakchia telh chih in tuak a si caah cheukhat cu nikhat suimilam 15, 16 Phone a tawngmi zong kan um lai tinak si cu..

Hi tluk taitai in Phone kan tonghmi hi, zei ko dah kan tuah nak? timi cit-hlatnak an hun tuah tthan tik ah hihi an hmuh tthan:

"Phone hmangmi vialte lak i zatuak 23% lawng nih an herh bakmi kawlnak le fimthiamnak cawnnak ca ah an hman i zatuak 72% tluk nih, a herh huaha lomi mi hmanthlak zoh, hngalh huaha lomi minung kip chonh, facebook a lu le taw cul dihnak le mi hmanthlak comment nak tuktak lawng ah Phone an hman ti a si.

Hihi a dik hrimhrim lai tiah kei cu ka zumh bak! Nang zeitindik na ruah ve?

Hi hi nihin vawlei mi tam deuh nih, nitin kan caan kan hmanning cu a si cang.

Phone kan rak hmuh bal hlan ah khan cun, ih lai le thawhkaa thlacam lo cu Laimi nih a phung ah kan rak ruat lo. Sihmanhsehlaw a ba-thla i Phone kan i cawk khawh i mi phaisa hal chawm in internet balance kan i rawn khawh hnu tu chan ahcun, Laimi lak ah ih lai le thawhkaa thlacammi kan tlawm ngaingai cang; phone nih thlacam caan a chuh!

Nu le fale caah caan an pe kho huaha ti lo!

Pasal le nih nupi caah caan an pe kho huaha ti lo!

Ihkhun cung ihtti hnu hmanh ah, nu le va bia nuam i ruah caan pek a har cang; mah le Phone veve zoh i zoh zuam ti lo in aa hngilh thaimi nupa Laimi lak ah kan tam cang!

Nu le va, nupa le fale karlak biasawng tlawrh le caan hmantti a tlawn ttung, Online ah muidawh le mirum lawngte kan hmuh a si fawn ttung. Cucaah mah le nupi/pasal le fale tlaihchannak a zawr i Online ah lungthin a chiami kan tlawm ti lo.

Nuva tampi a tthenter cang hna, tampi tthen rih a kan timh!

Cucaah kan Phone nih maw a kan hman lai kanmah nih dah kan hman lai? tihi fakpi in ruah caan a cu.

Tthat hnemnak chuahpitu, fimnak petu le pawcawmtu ah a hmang thiammi hna ca ahcun thluachuah a si ko.

Sihmanhsehlaw sifahtertu, min chiattertu le chungkhar ningzahtertu ah a hmangmi hna ca ahcun chiatserhnak a si ko cang hih!

"Minung hi a kan uktu poah i sal kan si. Phone nih a ukmi cu Phone sal kan si ko"..

Kan herhnak ah Phone hmang hna u sih..Phone nih a ka hman cang ko rua, na ti ahcun ttihnung dirhmun ah na dir cang khah..

By

Hrambik Lian

Kan Sualnak Nih A Kan Dawi Zungzal!

Kanmah Laimi pa bak nih ttha hnem ngai in, ram dang kal a duhmi minung 15 a hlen hna, tiah thawng kan theih. Hi pa nih hin, Laimi a phu phu in trip thum a hlen cang hna, ti a si.

Kan nih Lai miphun cu kan sifak, kan harsat caah phaisa le rumnak he pehtlai cun, hlen kan fawi!

Hi zawnte hi kan mifim thlachiat ruat lo pawl nih, caan ttha ah i lak in, mihlen nak ah an hman tawn.

Voikhat mi an hlen hnu ahcun, a voihnihnak i nawlhnak caan ttha an hmu i voihnih an hlen khawh hna ahcun Satan nih a umpi taktakmi lawng nih avoithumnak hlennak caan ttha hi an hmuh khawh!

Avoithum tiang lungfim tein mi na hlen khawh ahcun, na chan chung na tefa chan tiang minchiatnak nih an zulh peng cang cang lai. Ka fel tuk cang na ti zong ah miphun khat lung ah, "aaa an nih fel cu mihlen a duh ruang ah si lai, a fel le a tthat ahhin i ralring chinchin u" timi minung ah kan cang lai.

Hi dirhmun phanh hnu ahcun, kaa hrinthan ti zong ah mipi lungthin ah thar khawh a si ti lo. Zuu ding cu aa hrinthan ahcun, milungthin ah an thiang ko, zaangfah le dawttu an si lehlam.

 Sihmanhswhlaw hi bantuk mihlen hmangmi le mifir cu kan piangthar an ti zong ah, mipi lungthin ah an thiang kho ti lo; mithin lam a hunter chin!

Firnak le mihlennak in na hmuh phaisa cu a dih te lai, nain na minchiatnak cu a dih ti lai lo.

Mihleng peng, a fir peng nain a minchia bak lo ti a um kho loh!

Cucaah voikhat fak ngai in, mi na hlen i na fir cang a si ahcun fakpi in i ralring law ngol bak ko. Na peh sual ahcun, "Na Lo Cang"!

Number 32:23 ahcun "Na sualnak nihcun khuika hmun na um zong ah an kawl lai i an hmuh hrimhrim lai" tiah a ti.

Kan tuahning bantuk in vawlei zong ah kan zun lai caah fimkhur tein nung ko hna u sih..

By

Hrambik Lian

Nu Paw chung Nau Thah Cu Pathian Neek A Si!

Vawlei cung ah Kawlram nu pawl lawng hi an paw chung nau "fingthul' (thir-zum) in an that ngammi an si.

Nichuah Chaklei Asia ram ah, Kawlram hi nau pawi ruang ah thih a tam biknak ram pahnihnak a si.

Buddhist cozah ram a si caah Buddhist zumhning "nunnak a ngeimi poh upat/kilven ding" timi ruahnak he a Nu dam ko buin pawchung nau hrawh a ngah lo, tiah phunghram an ser.Nau pawi nu a damlo i a nunnak caah ttihnung a si lawnglawng ah nau hrawh ding; cu bantuk siloin nau a hrawktu sibawi cu kum 10 tiang thongthlak khawh an si, tiah Kawl cozah nih nawlbia an chuah.

Cu lawng siloin atu hlan Kawlram ahcun, pasal ngeih hlan ah pa he a sualmi nu cu, 'mirawk cat/mi lotlau/mi vaivuan le misual" ah hmuh an si.

Cucaah Nu pawl nih pasal loin Nau an pawi tik ah, mi nih pasal loin nau kan pawi hi an hngalh ahcun 'mirawk cat/mi lotlau/mi vaivuan le misual" ah an kan ruah lai, ti an phang. Cozah nih an khamh caah Zapi sizung ah nau an i hrawk ngam fawn lo.

Cucaah pasal loin Nau a pawimi Nu pawl Nau hrawhpiaktu ding ah Khuapi lam kiang le intang ah a thli tein cawnnak ngei huaha lomi pawl nih Nau hrawhnak dawr an tuah hna ti a si. Nau pakhat hrawh ah Ks. 50000 hrawng an lak hna.

Nau hrawhnak caah a herhmi hriam nam an ngeih dih lo caah a cheu cu, cycle kee thir zum le fingthul hna in an paw chung nau thi lak an sawh piak hna.

Hi kong ka rel lio ahhin ka taw hna a za; hei ruat ko hmanh. Nu an tawkaa in fingthul, thir-zum i an paw chung nau thih lak hei sawh khi, zeitluk in dah a va fah hnga mu!!

A cheu cu, cu bantuk tuah ngai an ngamh lo caah a thli tein an pawi i an hrin hnu ah mi hngalh loin an nau an hlawnh diam!

Hi bantuk thil a tuahtu hi Kawlmi lawng an si lo, kanmah Laimi zong tampi kan i tel ve!

Kawl Buddhist pawl zong nih an pathian cawnpiaknak he aa kalh ti an hngal ko nain an tuah ko i Laimi zong nih kan Pathian cawnpiaknak he aa kalh ti kan hngal ko nain kan tuah ve ko!

Minung le Pathian a kan tthentertu "sual" hi zeidang siloin Pathian nih a duh lo, Pathian tuah hlah a ka ti" timi fiang tein hngalh ko bu in a duh lomi thengte tuah lengmang hi a si!

Ka fapa nih a tuah khawh komi thil "ka fa  kha te kha hun ka pe ta" ka ti i a ka pek duh lo khin ka thin a hung tuk tawn. Cu nak zong in, "ka fa computer hi ka remh liopi si i tawng bak rih hlah mu" ka timi a theih ko buin a power off nak a hmeh i a ka phihpiak diam ahcun ka lung a fak tuk tawn.

Tuah timi tuah lo hi "lungkhawn" a si; tuah hlah, timi tuah cu "neek le zawmhteih" a si!

Bawipa nih "lai nan nawng lai lo" (EX.20:13) a timi kan hngalh ko buin Nu Paw chung NAU kan thah ahcun "Pathian kan neek le kan zawmhteih" taktak a si ko lai.

Amah sunparnak langhtertu ah aa sermi kan nih nihhin maw, a kan sertu pa cu kan hei Neek hnga???

By

Hrambik Lian

Hohmanh Mawhchiat Awk An Um Lo!

Ni donghnak caan a nai cang caah, Bawipa riantuanning a felfai, a piangfiang chin lengmang ko cang hih!

2013/14 hrawng ah Zuu a ri i a rak buai pengmi pawl Camping le Crusade ah tu le tu kan rak chiah hna. A lung aa thlengmi cu nihin ahcun mirum le bochanmi ah an chuak dih cang!

Aa thleng duh lomi le zuu din aa tlaihmi cu hmuh awk in an um ti hna lo; an thi pah dih cang hna!

"Na tuh bang in na zum lai" timi Pathian bia hi mikip cung ah rang chin lengmang in a tling cuahmah cang!

Thil sual tuahmi zong sau an i nuam kho ti lo; hmualphonak le ningzah nih a zulh colh ve hna!

Keimah zong nunning kaa palh ahcun rang taktak in mizapi hmai ah ka hmual a pho ve lai ti a hung fiang ngaingai; ningcang lo khuasak ttih a nung chin lengmang cang!

2 Samuel 16 kan rel tik ah, mipa pakhat nih siangpahrang David zapi hmai ah a vawlhpamh, chiat a serh i a hmual phohnak kan hmuh.

A cawngtu pawl nih an mawhchiat tik ah David nihcun "Bawipa nih keimah cawnpiaktu ding ah a thlahmi a si kho men" tiah a ti hna khah!

Thangchiat tlak in kan um caan le hmualphoh tlak in kan um caan ah, hohmanh nih ka hmual an ka phoh awk a si lo ti phun in, thangchiattu huat phun in um hlah u sih; hmual phohtu hi kanmah Cawnpiaktu ding ah Bawipa thlahmi an si kho men eeh!

Hmualphohtu caah Bawipa nih laksawng phun dang te a chiah piak ve ko hna!

Kan nih kan rian cu, zeidah ka palh tiah mah le mah i check i zapi hmai hmualphohawk um lo ding in um le i ralrintu hi a si awk a si ko.

Kan cung cio ah a tlung khomi zapi hmai hmualphonak hi nitin nunzia le tuahsernak in hrial peng a hau.

Kei zong ka hrial khawh lo ahcun mizapi hmai hmual phohmi ka si ve a hau te lai; cu tik ah hohmanh mawhchiat awk nan umte lai lo..keimah hi mawhchiat awk cu ka si te ko lai...

By

Hrambik Lian

Laimi Khrihfabu Thlarau Boruak hrawktu thil pakhat

Pathian Thlarau an hrawh le hrawh lo cu ka hngal ve lo; nain Khrihfabu pumhnak i caan upat lo nih minung Thlarau cu a hrawk bak!

Lai khuate Pastor ka ttuan lio ah pumh caan kan tlai peng ruang ah voikhat  cu, zarhpi Ni suimilam 11:00AM in pumh hruaitu a dir lai caah 10:30AM ahcun biakinn phanh khawh dih rak i zuam u, tiah thawng ka thanh.

Zarhpi Ni kan hung phan i suimilam 11:00AM a tlin ah dongh thlacamtu le keimah lawng biakinn kan phan. 11:20Am hrawng ah pumh hruaitu a hung phan. Member kan tlawm caah pumh dongh thlacamtu, pumh hruaitu le keimah lawng in thok chung awk a ttha ti lo. Midang chuah kan hngah i 12:00 hrawng ah pumh thok taktak cu a si! Suimilam 1 tluk kan tlai!

"Khah, hla sa pah hna u sih", an hun ti ah khin cun kei cu ka paw ttam i ttin ka duh cang! Cu ahcun pumhhruaitu nih pumh hruaitu Baibal rel pah ah "sermon pate", minute 20 hrawng a hun chim tak ve. Thok thlacam dih ah thawngthanh caan si lai a ti i Khrihfabu thawngthanhtu nih "sermon pate" a thlak i minute 30 hualham a lak ve. Thawngthanh dih ah, a duhmi tehte khannak caan si lai a ti tthan i minung 2 nih minute 30 veve an khan ai.

Cu hnu i thawngthachim nak caan si lai, an hun ti ahcun chimduhnak lungthin ka ngei kho huaha ti lo-an chim ciami kha i rinh koning hun ti khi ka lung chuak pah; ka minung thlarau a hrawh!

Cu hmun i ka cawnmi cu, pumh kan thok lai ti caan thok lo ahcun aa pummi Khrihfabu member tam deuh cu an Thlarau tha a tho kho ti lo; an minung Thlarau tha-thawhnak a rawk!

Pumh kan thok lai ti caan te i kan thok khawh lo tik ah, hruaitu nih Khrihfabu member kan mawhchiat tawn hna khah. Khuate ahcun member kan tlawm tuk caah an chuah lo ahcun a thoktu kan um ti lo caah member an mawh kho men!

Sihmanhsehlaw Khuapi Khrihfabu ah Pumh kan thok lai ti caan ah kan thok khawh lomi cu HRUAITU santlaih lo a si!

Member an tlin dih hnu lawng ah pumh thok ding timi ruahnak kan ngeih chung poah cu Pumh thok kan tlai peng ko lai.

Cucaah Caan hman tein pumh thok khawh kan duh ahcun, hruaitu nih caan hmangtu ding minung pawl kha a caan hman bak ah an chuah khawhnak hnga ralrin pek, chawnh an hau. Cu hnu ah pumh thok ding kan timi caan a phanh hlan minute 15 hrawng ah hlahruaitu dirter i 11:00AM tiang lawng nan hruai lai, tiah nawlpek an hau. Cun, hlahuaitu an thut bak in minung 20 lawng an chuah rih zong ah, pumh hruaitu a dir hrimhrim a hau. Cu caan tiang i a chuak lomi caan hmangtu ding pawl cu a chuakmi in thlen dih ding an si ko.

Cu bantuk in kan tuah ahcun, tlaipi i a chuakmi member cu pumh dih lai hrawng lawng ah biakinn an phanh peng lai caah an ning a zak lai, saupi an peh zuam hrimhrim lai lo. Thlakhat ttha tein hi bantuk in kan kalpi ahcun Khrihfabu ah pumh thok tlai ti bia a um lai lo!

Ramdang le ram ttha a phan cangmi Laimi Khrihfabu tampi zong Pumh Thok Caan an tlai peng ti thawng kan theih. Ram ttha ah nan um i mawtaw le zei he, zeitindah pumh thok nan tlai khawh?

Hruaitu nih caan hman tein thok ding kan timh taktak lo ruang ah a si kho men.

Kan nih Delhi kan Khrihfabu, Lai Christian Church (LCC) ah zarhpi Ni zingpumh thok minute 5 zong kan tlai sual bal lo! 11:00AM ah kan thok lai, kan ti ahcun 11:00AM bak ah hla hruaitu an tthu, 11:00AM bak ah pumh hruaitu a dir i cucu pumh thok cu si ko.

Member lak ah rian tlaih aa lawh cio lo caah, a tlai deuhmi zong cu kan um ve tawn; nain pumh thok hnupi i va luh peng cu kan ningzah cio caah a tlaimi hi cu lo theih lo thil tuah awk a ngeimi lawng an si si cang.

Kan thok lai timi caan te i pumh thok ahcun Hlasak zong a nuam, thawngthachim zong lung a tho i pumh zong a nuam. Cu nihcun duhsah tein Khrihfabu thlarau boruak a remh i member nih an cheuhra le thawhlawm Khrihfabu i an pek tikah a man-hla, a sunglawi tuk in an ruah. Cucu Khrihfabu tthancho cu a si ko!

By

Hrambik Lian