Iron Rose Media Lutlai Pa Nih Mi Nupi Cia A Si A Hngal Hnga Lo Maw?

Kan hnuzarh ah Rengon hrambunh Zarhtin chuak, Iron Rose thawngzamh lutlai Ko Wai Yan Heinn cu amah zung cia te ah, thah a si. A ttang, a paw le a paang hrawng ah voi 15 bak nam in an sawh!

Hi bantuk in voi tam tuk nam in an sawh, an nolh chihmi zoh tik ah, a thatu nih thinhun bak in a thahmi a si ti a fiang!

Hi pa hi Kawl ralkap bawi tthatlonak kong ttial tawntu a si caah, kawl ralkap he aa pehtlaimi pakhat khat kut a si rua, tiah ruah cio a si!

Sihmanhsehlaw palik nih biaktak tein an hun hlat tik ah, a thattu cu Singapore hrambunh Shipping Company pakhat ah riansang ttuanmi U Aung Ko Ko a rak si ai.

Khah, U Aung Ko Ko nih a thahnak ruang cu hiti hin a chim: "Ko Wai Yan Heinn nih ka nupi a duh, facebook in a chawnh peng, kan inn zong ah a len, hotel ah a kalpi i keimah ka ttin poah ah a zam. Cu bantuk in ka nupi a duh caah ka thah ko" tiah palik sin ah fiangte in a chim.

Ruah awktlak ngaimi pakhat cu, "Hi thawngzamtu pa, Ko Wai Yan Heinn nihhin a duhmi nu kha pasal ngei cia a si a hngal hnga lo maw?" tihi a si.

Thawngzamhtu cu midang nih hngalh lomi hmanh a hngaltu an si! Thil thli-thup le innkhaan chung cawlcanghnak kong ah a thei khotu an si caah pasal ngei cia a si hi a rak hngalh tuk hringhran ko lai!

A si ahcun, ziah pasal ngei cia cu a duh?

Pasal a ngeih cang a hngalh lo ruang ah siloin "hngalh bu tein, lungfim tein" a duh hramhram mi khi a si ko!

Mi nupi cia duh cu thil tthalo a si zong a hngalh dih ko bu in, a ttha lo tiah a hngalh komi kha lungim tein tuah aa thi hramhram khi a si ko.

Hi pa hi misual tuk ah kan ruah khawh men..

Nifatin kan nunnak ah, thil ttha le thil ttha lo cu fiang tuk in kan hngalh dih ko nain kan nih zong nih "thil ttha lo" tuah kan i thim peng ve ko hih!

Hi pa bantuk mi nupi le mi pasal a si ko ti hngal ko bu in, facebook, viber,online le offline in mi duh a hmang Laimi zong kan tam tuk cang!

Zuu din a ttha lo, ti kan hngalh ko nain kan ding peng ko hih! Kuak zuk, sadah hmuam nih mintthatnak a chuahpi bal lo ti kan hngal ko bu in kan tuah peng ko hih! Bia duh, fir, mi chiatnak kong ceih le mi le mi karlak buainak chuahter cu an tthat lo kan hngal ko nain tuah kan i thim peng ko hna hih mu..

Kan hngalh lo ruang ah kan tuah sualmi siloin hngal bu te le lungfim tein kan tuahmi a si caah zeibantuk dantatnak poah kan i phu ko! Kan tuh bantuk cio in vawlei zong ah kan zum lai i van zong ah kan zum dih ko lai..

Pathian duhmi le thil ttha zeidah ti vial hngalh dih ko ttung i a ttha lomi tuah aa thim pengmi cu Pathian he hawikom an si kho lo; Pathian he an i tthen!

Pathian he aa tthenmi cu:

1. Thil ttha lo a simi zuudin, kuakzuk, biachia chim, mi nupi/pasal duh piak le mihmual phoh ah an ral a ttha i Thlrau lei a simi thlacam, thawngthachim le thangthatnak hla sak ah an ral a chia!

2. Hi hi cu thil ttha lo a si, tuah hlahning, ngol cangning an ti ve tawn nain sual teitu Khrih Thlarau an ngeih lo caah tuah lo in an um kho taktak bal lo, an ngol kho lo; an mah zong nih duh lomi thil ttha lo tuah peng sal ah an tang!

Hi bantuk minung cazin ah naa tel ve sual ahcun, na herhmi cu "Khrih Thlarau co" lawng a si! Kaa zum ning a tthat deuh lo caah a si lai, fak deuh in kaa zuam rih a hau timi men lai. Nain Khrih Thlarau na co hlan lo poah, mah ti khan na si peng ko lai!

"Sihmanhsehlaw nannih cu cuticun nan nung lo; Thlarau hruaining tu in nan nung deuh —Pathian Thlarau a ngei lomi cu Khrih ta an si lo. Sihmanhsehlaw Khrih cu nan chung i a nun ahcun sualnak ruangah nan pum cu thi hmanh hna seh law nannih cu Pathian he nan i rem cang caah Thlarau cu nan caah nunnak a si" (Rom. 8:10-11)

Bawipa Nih thluachuah in pe hna seh...

Nan unau,

Hrambik Lian