Lai khuate Pastor ka ttuan lio ah pumh caan kan tlai peng ruang ah voikhat cu, zarhpi Ni suimilam 11:00AM in pumh hruaitu a dir lai caah 10:30AM ahcun biakinn phanh khawh dih rak i zuam u, tiah thawng ka thanh.
Zarhpi Ni kan hung phan i suimilam 11:00AM a tlin ah dongh thlacamtu le keimah lawng biakinn kan phan. 11:20Am hrawng ah pumh hruaitu a hung phan. Member kan tlawm caah pumh dongh thlacamtu, pumh hruaitu le keimah lawng in thok chung awk a ttha ti lo. Midang chuah kan hngah i 12:00 hrawng ah pumh thok taktak cu a si! Suimilam 1 tluk kan tlai!
"Khah, hla sa pah hna u sih", an hun ti ah khin cun kei cu ka paw ttam i ttin ka duh cang! Cu ahcun pumhhruaitu nih pumh hruaitu Baibal rel pah ah "sermon pate", minute 20 hrawng a hun chim tak ve. Thok thlacam dih ah thawngthanh caan si lai a ti i Khrihfabu thawngthanhtu nih "sermon pate" a thlak i minute 30 hualham a lak ve. Thawngthanh dih ah, a duhmi tehte khannak caan si lai a ti tthan i minung 2 nih minute 30 veve an khan ai.
Cu hnu i thawngthachim nak caan si lai, an hun ti ahcun chimduhnak lungthin ka ngei kho huaha ti lo-an chim ciami kha i rinh koning hun ti khi ka lung chuak pah; ka minung thlarau a hrawh!
Cu hmun i ka cawnmi cu, pumh kan thok lai ti caan thok lo ahcun aa pummi Khrihfabu member tam deuh cu an Thlarau tha a tho kho ti lo; an minung Thlarau tha-thawhnak a rawk!
Pumh kan thok lai ti caan te i kan thok khawh lo tik ah, hruaitu nih Khrihfabu member kan mawhchiat tawn hna khah. Khuate ahcun member kan tlawm tuk caah an chuah lo ahcun a thoktu kan um ti lo caah member an mawh kho men!
Sihmanhsehlaw Khuapi Khrihfabu ah Pumh kan thok lai ti caan ah kan thok khawh lomi cu HRUAITU santlaih lo a si!
Member an tlin dih hnu lawng ah pumh thok ding timi ruahnak kan ngeih chung poah cu Pumh thok kan tlai peng ko lai.
Cucaah Caan hman tein pumh thok khawh kan duh ahcun, hruaitu nih caan hmangtu ding minung pawl kha a caan hman bak ah an chuah khawhnak hnga ralrin pek, chawnh an hau. Cu hnu ah pumh thok ding kan timi caan a phanh hlan minute 15 hrawng ah hlahruaitu dirter i 11:00AM tiang lawng nan hruai lai, tiah nawlpek an hau. Cun, hlahuaitu an thut bak in minung 20 lawng an chuah rih zong ah, pumh hruaitu a dir hrimhrim a hau. Cu caan tiang i a chuak lomi caan hmangtu ding pawl cu a chuakmi in thlen dih ding an si ko.
Cu bantuk in kan tuah ahcun, tlaipi i a chuakmi member cu pumh dih lai hrawng lawng ah biakinn an phanh peng lai caah an ning a zak lai, saupi an peh zuam hrimhrim lai lo. Thlakhat ttha tein hi bantuk in kan kalpi ahcun Khrihfabu ah pumh thok tlai ti bia a um lai lo!
Ramdang le ram ttha a phan cangmi Laimi Khrihfabu tampi zong Pumh Thok Caan an tlai peng ti thawng kan theih. Ram ttha ah nan um i mawtaw le zei he, zeitindah pumh thok nan tlai khawh?
Hruaitu nih caan hman tein thok ding kan timh taktak lo ruang ah a si kho men.
Kan nih Delhi kan Khrihfabu, Lai Christian Church (LCC) ah zarhpi Ni zingpumh thok minute 5 zong kan tlai sual bal lo! 11:00AM ah kan thok lai, kan ti ahcun 11:00AM bak ah hla hruaitu an tthu, 11:00AM bak ah pumh hruaitu a dir i cucu pumh thok cu si ko.
Member lak ah rian tlaih aa lawh cio lo caah, a tlai deuhmi zong cu kan um ve tawn; nain pumh thok hnupi i va luh peng cu kan ningzah cio caah a tlaimi hi cu lo theih lo thil tuah awk a ngeimi lawng an si si cang.
Kan thok lai timi caan te i pumh thok ahcun Hlasak zong a nuam, thawngthachim zong lung a tho i pumh zong a nuam. Cu nihcun duhsah tein Khrihfabu thlarau boruak a remh i member nih an cheuhra le thawhlawm Khrihfabu i an pek tikah a man-hla, a sunglawi tuk in an ruah. Cucu Khrihfabu tthancho cu a si ko!
By
Hrambik Lian
No comments:
Post a Comment