Thursday 20 November 2014

Khrihfa Baibal: Pathian Cauk Ngeihchun



(Part III)

Baibal Chung Telh Ding Cauk Hi Ho Thim Mi Dah An Si?

 

Biahmaithi:
Khuate pakhat ah khrihfa upa pakhat nih “ziah tu chan kan mifim hna hi Baibal an tial ti hnga lo ee. A sau tuk kan hman cang i a thar rak kan tialpiak hna sehlaw a tha hnga ee,” tiah a ti. Tu chan ahhin Pathian sinin langhnak a hmumi um hna sehlaw an hmuhmi Pathian bia cu Baibal ah chiah awk a tha ve hnga lo maw? Atu kan Baibal uk 66 lawng hi maw Pathian bia?  Baibal cauk tial an rak si lio hrawngah Pathian kong tialnak cazual dang tampi an rak um ve va si kaw, cu hna lakah…“hihi Baibal ah telh siseh, hihi Baibal ah telh si hlah seh,” tiah cauk thimnak a rak tuahtu hi hodah an si? Zeitik ahdah khrihfa Baibal cu uk 66 in siseh, tiah biachahnak an tuah? Baibal chung an telhmi cauk ahhin a hman lomi cauk telhchih sual khawh a si hnga maw? Ziah uk 66 theng? ti bantuk biahalnak pawl hi a tanglei ahhin fiang tein fianter an si.


A. Hebrew Baibal A Chuahning:

Genesis in Malachi tiang khi Hebrew holh in tial a si. Ezra 4:8-6:18; 7:12-26; Jeremiah 10:11; Daniel 2:46-7:28; le Genesis 31:47 hna bal hi Aramaic holh in tial an si. Tu chan khrihfa nihcun Genesis in Malachi tiang hi cu Biakam Hlun (Old Testement) tiah kan auh cio. Asinain Biakam Thar catialtu hna nihcun “Cathiang” tiah an rak auh. Zeicatiah mah hi an Baibal ngeihchun a rak si. Chan thar baibal thiamsang tampi nihcun cu Hebrew miphun (Judah miphun) zumhnak hrampi le cathiang ngeihchun a si ruangah ‘Hebrew Baibal’, tiah an auh. 

Biakam Hlun (Hebrew Baibal) cu Jesuh chan tiang ahkhan Nawlbia, Prophets cauk le writtings tiah then thum ah then a rak si (Luke 24:44). Judah miphun nihcun Biakam Hlun uk 39 kan timi hi uk 24 lawngah an rak chuah; Ezra/Nehemiah hi uk khat ah an fonh, 1 le 2 Samuel uk khat ah an fonh, 1le 2 Kings hi uk khatah an fonh, 1 le 2 Chanrelnak uk khatah an fonh hna i minor prophet kan timi Hosea in Malachi tiang uk 12 khi uk khat auh in (the twelve) tiah an rak auh.

Hi cauk vialte hi tial an si in chan tampi chungah, cathiang caah hman an si rualrual in, pumhkhomh an rak si. A.D.90 kum ah Judah phungbia cawnpiaktu le baibal thiamsang bu cu Mediterranean rili cung ummi Jamnia timi hmun ah hi Biakam hlun (Hebrew cathiang) kongah hin hmuhtonnak an rak ngei. Cun A.D. 118 kum ahkhan avoihnihnak hmuhtonnak an rak ngei than i cu lio ahcun atu tiang a hmunmi Biakam Hlun cauk (39) hi cathiang chungtel cu an si, tiah fehternak an rak tuah. Fehternak an tuah ti tikah kan hngalh a herhmi cu hi uk 39 hi tial an si thok tein Jewish community nih Pathian bia ah an cohlan i, chan tampi zumhnak hram le nuncawnpiaktu ah an rak hman cang ciami kha an fehter, tinak khi a si. Pathian bia a si maw si lo, timi checknak an tuah khi siloin Judah biaknak nih chan tampi chung Pathian bia ah a cohlan cangmi fehternak an rak tuahtu khi a si deuh.

Cucaah Biakam Hlun cauk hna kongah hin Pathian bia a si lomi cauk an telhchih sual hnga maw, tiah lunghrinh awk pakhat hmanh a um lo. Pathian nih, vawlei a hmunh chung, minung nih kan herhmi a bia cu, minung a tialter hna i cucu Pathian thiang thlarau riantuannak in mipi nih Pathian bia ah an cohlan hna. Cucu Jesuh zong nih ‘Cathiang, tiah a rak cohlan mi le Pathian bia’, tiah a cawnpiaknak ah a rak hmanmi kha a si. Jesuh hmanh nih ‘cathiang/Pathian bia’ tiah lungawltawm lo tein a cohlanmi le a hmanmi a si ko caah, Biakam Hlun kongah cun buainak a um lo tein Pathian thawhchuah hnawhmi an si dih ti cu alawk a um lo.
  
 
B. Biakam Hlun Le Biakam Thar Fonh A Sining:

Jesuh Khrih a thih hnu caan tlawmpal in zultu le zumtu hna nih hngah pengmi Judah siangpahrang, mi khamhtu Messiah a si hrimhrim, tiah an zumhmi Jesuh cawnpiaknak le nunning kong cu tial hram an thok colh ve. Cun Jesuh zumh ruangah harnak a tongmi hna hnemhnak caah siseh, Jesuh cawnpiaknak hngalh an herhmi hngalhternak caah lamkaltu hna nih an mit in an hmuh i, an hna in an theihmi Messiah cawnpiaknak kong cu an tial i, zumtu mibu hna sinah an kuat hna. A.D.100 hrawngah cun Jesuh khrih a mit in a rak hmutu zultu le zumtu hna kha an thi pah dih cang. Jesuh Khrih kongah zumh lonak bia, hlennak bia le lunghrintertu bia a phunphun chuah hram aa thok cang. Cucaah kha lio chan zumtu hna nih an zumhmi a hmanning kha an chimfian i an ven khawhnak hnga, biatak tahfung (canon) an hun herh cang. Can saupi chungah Pathian thawchuahhnawhmi cauk an hngalh khawhnak hnga Pathian bia hrimhrim a si, tiah cohlan a si cangmi cauk hna cherhchan in biatak tahfung an ser i, cu tahfung hmang cun zumtu nih Pathian thawchuahmi cauk ah ruahmi poah kha an rak tah hna. Cu biatak tahfung hna cu:


1. Hi cauk hi Pathian prophet asiloah Lamkaltu hna hmangin, tialmi a si maw?

2. Hi cauk hi thawnnak le huhman a ngeimi, a si maw?

3. Hi cauk hi a hmu hmaisabiktu mibu nih Pathian bia ah an cohlangmi, a si maw?

4. Hi cauk hi minung nun thleng khotu thlarau thawnnak a ngeimi, a si maw?

5. Hi cauk nih Pathian kongah biatak a chim maw siloah a chimmi chungah aa kalhmi, a um maw?

  
C. Biatak Tahfung In Kan Baibal Tahnak:

Pakhatnak: Biatak tahfung ah a tlingmi cauk cu lamkaltu asiloah a mit hrimhrim in a hmutu hna chimmi cherhchan in tialmi a si lai. Biakam Thar cauk 27 hi an dihlak hi tahfung ah a awngmi lawngte an si. Mathai thawngtha tialtu, ngun khuai khawltu Matthew khi a thawngtha cauk a tial hlanah Jesuh zultu tha a rak si. Mark thawgtha tialtu John Mark khi, zultu Peter thlarau fa a si (Peter 5:13), cun lamkaltu Paul hnuzul zong a rak si fawn (Acts 13:4-5). Cucaah Mark thawngtha hi zultu Peter nih Jesuh kong a chimmi cherhchan in a tialmi a si, tiah zumh a si. John thawgtha tialtu John zong Jesuh nih a dawtmi zultu tha a si.

Luke thawngtha tialtu khi doctor Luke a si i lamkaltu Paul a voihnihnak khawl tlawnnak ah a zultu a rak si ve (Acts 16:10). Luke thawngtha hi a mit hrimhrim in Jesuh Khrih a rak hmutu hna chimmi cherhchan in a tialmi a si ve (Luke 1:1-4). Lamkaltu Paul nih cakuat a tialmi vialte hi thihnak thothan Jesuh Khrih, a mit hrimhrim in a hmuh hnuah a tialmi an si ve (Acts 9:1-6). James le Jude  cakuat tialtu hna cu Jesuh chuahpi naule an si caah a mit in a hmutu bak an si ve. Hi tahfung pakhat hmanh nih hin, Baibal ah mitampi nih cohlan an duhmi cauk tampi, a hnawhchuah cang hna.

Pahnihnak: Biatak tahfung ah a tlingmi cauk cu a hmangtu mibu sinah huham, upatnak le nawlngeihnak a ngei/hmumi cauk a si lai. Jesuh kong he pehtlai in catialmi hna lakah, mipi nih upatnak pek lomi le hmuham a ngei lomi cauk tampi an rak um. Tahchunhnak ah ‘The First Gospel of the Infancy of Jesus Christ’ timi (thawngtha cauk tiah micheu nih zumhmi) hna ahcun “mipa pakhat cu dawihnak ruangah lafa ah aa cang sihmanhsehlaw ngakchiapa Jesuh, cu laa keng cung an chiah bakah minung ah aa cang than (7:5-27) tiah a chim. Jesuh nih a ngakchiat lioah chantlung sermi vate le saram hna cu nunak a pek hna (Dal. 15), Jesuh nih a pa rian a rak bawmh lioah a pa nih hme tukin a ser sualmi thutdan cu, a thawnnak chuah in, a dawhpiak (Dal. 16), Jesuh nih a mah dodaltu ngakchia pawl a thah hna (Dal. 19:19-24), tiah a tial. Hi bantuk cauk pawl hi Jesuh kong thawngtha cauk tiah a tialtu nihcun a aupi ve len lai nain upatnak le nawlngeihnak (pathian bia he aa tlami huham) a hmu lomi cauk an si. Thiang Thlarau sinin a rami thawngtha an si lo, ti hngalh a fawi te.

Pathumnak: Biaktak tahfung ah a tlingmi cauk cu khrihfabu le zumtu mibupi nih Pathian bia ah cohlanmi a si lai. Paul nih Ephesa cakuat a tialmi khi Ephesa kiangkap ummi zumtu vialte nih an rel dih cikcek i khrihfabu nih Pathian bi ah an rak cohlan hna. Cakuat dang a tialmi vialte hna zong cu bantuk cun zumtu vialte nih an rel dih hna i a relhmaisa bikmi mibu zong nih Pathian bia hrimhrim ah an rak cohlannak kong cu a cakuat ah tampi hmuh khawh an si. Kha lio vawlei cung dihlak khrihfabu nih Pathian thawchuah hnawhmi ah an rak cohlan hmaisa mi Biakam Thar cauk hna cu Matthew, Mark, Luke, le John thawngtha cauk hna hi an rak si.

Palinak: Biatak tahfung ah a tlingmi cauk cu minung nun thleng khotu thlarau thawnnak a ngei mi a si lai. Cathiang chung bia cu theih le an rel tikah minunnak thlen khawhnak thawnnak an ngei. Hi lio caan ahhin a deu in khrih kong thawngtha hmun kipah karhter aa timmi cawnpiaktu hmanlo tampi an rak um. Cu hna catialmi micheu nih cathiang a si ruah tiah chikhat cu an i ruah khawh men ko nain an chungah nun thlengtu hmual an ngeih hna lo caah caan saupi relhuam an si lo. Sihmanhsehlaw Pathian biatak Baibal cu tam deuh kan rel ah, tam chinchin rel kan duh. Voitam deuh kan nolh ah kan tlin lonak tam deuhdeuh a kan hmuhter. Zeicatiah atu kan Baibal chung cauk vialte hi mah test a awngmi lawngte an si. Baibal ca rel le ca dang sawhsawh rel aa lo bak lo khih! Lungthin thiang tein a reltu hna nihcun Baibal cu cauk dang sawhsawh bantuk a si lo, timi hi an fiang cio ko lai.

Panganak: Biatak Tahfung ah a tlingmi cauk cu Pathian kongah biatak a chimmi le a cawnpiaknak aa kalh lomi a si lai. Khrihfa kan Baibal hi an mah le an context an chim duhnak kheng tein cithlat tikah aa kalhnak pakhat hmanh hmuh a si lo. An dihlak in Pathian kong an chim cio nain an cawnpiaknak aa kalhnak pakhat hmanh a um lo. Baibal chungah hngalhhar asimi cu tampi an um ko nain aa palhmi bal a um lo. Khat le khat aa lawmh lonak tete hi zumlotu hna nih khrihfa Baibal aa kalh, tiah soitainak ah an chuahpi tawn hna sihmanhsehlaw Genesis in Biathlam tiangah cauk dang cawnpiakmi doctrine he khat lo rumro in, aa kalhmi pakhat hmanh a um lo. Kan Baibal uk 66 hi a dihlak in, mah test a awng dih cangmi an si. A hnuah kan Baibal aa kalh loning le aa kalh an timi tete fianternak tial than khawh kan i zuam te lai.

Khrihfabu cu mibu riantuantinak a si caah biatak tahfung ah a tlingmi cauk hna cu khrihfabu biachahnak le namhetnak in fehter an hung si hna. Khrihfabu nih avoikhat nak ah an rak namhet/fehtermi, Biakam Thar cauk cu Muratorian Canon, tiah auh a si. Muratorian Canon cu A.D.200 hrawngah khan funkhawmh a rak si cang. Cu canon ahcun I & II Peter, III John, le Hebrews cauk hna hi, a tialtu fiang tein an rak hngalh hna lo caah, telh an si lo. Hihi kha lio Roman khrihfabu nih an rak hman mi an si.

Nihin kan ngeihmi Biakam Thar tling tein, a hung chuah hi cu A.D. 367 kum ah a si. Biakam Thar cauk 27 tlamtling tein a hun khawm hmaisa biktu hi Athanasius a si. Hi pa nih a funkhawmhmi hi A.D.393 kum Hippo Regius khua council meeting ah voikhat,  A.D.397 kum Carthage khua council meeting ah voihkhat, tiin Church Council meetingpi voihnih tiang an tuah i an ceih hnuah Pathian thauchuahmi cauk an si, tiah namhetnak/fehternak an rak tuahmi a si. Ka chim cang bantukin hi Biakam Thar cauk 27 hna hi kha lio chan khrihfabu hna nih an khrihfabu cioah tha tein an rak hman pengmi le Pathian bia nih aa tlakmi upat hmaizahnak an rak pek zungzal ciami an si ko hna. Church Council meeting nih namhetnak a tuah tikah zeibantuk khrihfa ca hmanh ah thilrit a rak si hrimhrim lo. Church Council nih a tuahmi cu Pathian bia ah mipi nih an cohlan dih cia pengmi, zapi hngalh in, hun fehterte lawng khi a si. A thar an chapmi pakhat hmanh a um lo. Cun hi bantuk in Biakam Thar cauk 27 namhnet le fehter a si lio caan ahkhan hi cauk 27 hi Biakam Hlun (Hebrew Cathiang) he aa kemh in khrihfabu nih chan tampi an rak hman cang.

Cucaah Church Council nih meeting thu duak zau in, Biakam Thar cauk 27 hi Biakam Hlun cauk 39 he kan fonh lai maw fonh lo, tiah ceih haumi a rak si lo. Hlan chan ah Pathian nih minung hmangin a rak tialmi cauk (Biakam Hlun) cu an mah chan zumtu hna nih Pathian bia an si, tiah tha tein an rak ven peng ko i, Jesuh thih hnuah Pathian nih minung hmangin a hun tial thanmi (Biakam Thar) zong cu an mah chan zumtu hna nih Pathian bia an si, tiah tha tein an rak ven ve ko hna. Pathian Bia an si, tiah an venhim mi cauk hlun uk 39 (Biakam Hlun) cu cauk thar 27 (Biakam Thar) he hmun khat teah, Pathian thiang thlarau hruainak in, aa tluk teah an ruah hna i hmun khat ah an rak hman peng ko hna. Pathian bia ah cohlanmi cauk hlum hnih cu, an dihlak in fonhkhawmh/cauk pakhat ah ser an hung si tikah, ikalhnak le palhnak pakhat hmanh a ngei lomi atu kan Khrihfa Baibal hi a si ko. A mak tuk ka ti!

Biadonghnak
Vawlei cung cauk relcawk lo lakah Khrihfa Baibal cauk 66 theng Baibal ah a telhtu cu minung siloin a cauk ngeitu Pathian a si. Hi uk 66 leng hin Baibal cauk dang belh chah a herh ti lo lawng siloin belhchap khawh zong a si ti lo. Zeibantuk cauk tha an si zongah Biatak tahfung (the tests of canonicity) ah an sung dih; an tling kho ti lo hrimhrim. Hi tahfung ah a tling kho mi cauk cu zeitikhmanh ah a um bal ti lai lo bantukin hi uk 66 leng hin zeitikhmanh ah Baibal cu chap a si ti lai lo! Atu naa tlaihmi na Baibal kha Pathian nih minung sinah a pekmi Pathian Cauk Ngeihchun dahkaw a si cuh!








 


Monday 17 November 2014

Khrihfa Baibal: Pathian Cauk Ngeihchun


                              (Part II)
 Khrihfa Baibal Cu Zei Nih Dah A Phun Danter?
Biahmaithi:
Baibal cu a palh kho lo nain biaknak dang cathiang vialte cu an palh, tiah kan zumh. Zeidah a ruang? Khrihfa nih kan Baibal kan zumh le kan bochan bantukin an nih zong nih an cathiang cu an zumh i an bochan ve ko tung? Kan mah Baibal vial a dik ti i, midang Baibal vialte a palh dih, ti cu ruahnak bit tuk le mah lawng a tha in ihmuh a si hnga lo maw? Asiah zeicem nih dah khrihfa Baibal cu a phun danter kun?

A. Khrihfa Baibal Cu Biaknak Dang Cathiang Hna He An Tinhmi Aa Khat Lo:
Pluralism pawl nihcun “vawleicung biaknak cu lam dangdang in, tlang pakhat cungah kai aa timi bantuk kan si ko. Cucaah zei Pathian na zumh kha biapi a si lo zeicatiah an dihlakin an tinhmi aa khat ko. Muslim nih Allah an timi le khrihfa nih Jehovah kan timi aa khat ko i, Buddhsit le Hindu nih an kawl pengmi zong hi khrihfa nih kan biakmi Pathian hi a si ko. Cathiang dangdang kan ngeihmi hna hi diary bantuk sawhsawh khi an si. Cucaah nang na diary a palh i kei ka diary a hman, timi hi cu a um awk a si lo”, tiah an ti. 
Pluralism pawl nih vawlei cung biaknak le an cathiang hna an hmuhning cu hah a dam ngai ngai. Vawlei cung biaknak vialte cu zumhmi le tinhmi ah kan i khat dih ahcun kan cathiang cio nih an chimmi zong a tlangpi tal in aa khah ve awk a si. Cucaah aa khah le khah le hun zoh ta duak u sih!

Buddha nihcun “pathian a um lo” tiah a cawnpiak hna; a zultu cheukhat tu nihcun a mah kha an rak biak. A zultu vialte kha harsatnak chungin nan luat khawhnak hnga, chawva duhnak hi hrial u, tiah a rak cawnpiak hna. Four Noble Truths le zulhphung 8 (Eight-fold Noble Path) khi hngalhternak luzit (enlightenment) phanhkhawhnak lam a si, an ti. An cawnpiaknak dihlak hrampi an cathiang cu Tripitika a si.

Hindu nihcun pathian 33 million a um, tiah an zumh nain sermi thil vialte cung nawl ngeitu BAWI timi hi an ngei lo. An biakmi vialte lakah a ngan cem ah an chiahmi hna cu Brahman (sertu pathian), Vishu (venghimtu pathian), shiva (biaceihtu/hrawktu pathian) hna an si. Brahman hi vawlei le van a serchuaktu a si ti siloin ningcang tein a chiatu thawnnak (sustaining force) a si, tiah an ti. An cathiang vialte lakah a upat cemmi Rigveda nih Brahman cu zumtu hna raithawinak ah aa langmi thlarau thawnnak a si, tiah a ti. Cucaah Brahman cu pumpak pathian (personal God) siloin thli thawnnak (force) bantuk ah khin an zumhmi a si. Cucu an pathian ngan cem a hai si ko!

Muslim nihcun Allah hi vawlei le van dihlak cung nawlngeitu pathian a si, tiah an zumh. ‘Allah’ timi cu Arabic biafang a si i “pathian” tinak a si. An zumhning ahcun Jesuh zong hi Allah prophet pakhat a si ve nain pathian fapa ngeihchun cu a si lo, ti a si. Khamhnak cu Koran chimmi zulhnak le nawlngeihnak in a ra, tiah an zumh. Koran cu Allah nih prophet Muhammad sinah direct in a hmuhtermi biaphuan a si caah biaknak cauk vialte lakah a sang bikmi cathiang a si; Pathian biatak aumnak cauk cu Koran lawnglawng hi a si, tiah an ti.

Judah phung aa tlaihmi hna nihcun Yahweh pathian cu Moses pekmi nawlbia le an cathiang (biakam hlun) chung prophet hna hmangin an sinah aa lang, tiah an zumh. Jesuh cu Messiah a si lo an ti. Cucaah Biakam Thar cauk hi Pathian bia ah an pom lo. Ning cang le dawhheih tein kan nun ruangah Pathian zangfahnak kan hmu lai, tiah ruahchannak an ngei.

Mormons pawl nihcun Pathian nih Baibal chung zongah aa langh bantukin Mormon cauk chung zongah aa langh ve, tiah an ti. Hi cauk hi Moroni timi vancungmi sin in ka hmuh, tiah Josheph Smith nih a ti. An nih zumhning ahcun pathian cu ruh le sa ngeimi, kumkhua hmunmi, le Jesuh a chuah khawhnak hnga Marry he nuva sinak zong a tuahmi a si, ti a si. Khamnak le vanlei thluachuah cu Joseph Smith sinah phuan asimi langhnak zulh le nawlngeihnak in a ra lai, tiah an zumh.

Biaknak kip ngeih ciomi cathiang nih tinhmi pakhat an ngei dih hrimhrim lo. Tinhmi dang cio an ngei dih. A cunglei kan chimmi biaknak hna hi aa lomi pakhat hmanh an um lo. An lakah pakhat a hman ahcun, a dang cu an palh tinak a si hnga. Cucaah zeitindah khrihfa Baibal cu zei nih dah a phun danter i, a cung nung cem ah a chiah, tihi tawi tein hun zoh rih u sih.

B. Biaknak Dang Cathiang le Khrihfa Baibal Aa Dannak
 A cunglei kan relmi in vawlei cung biaknak ngan ngan hna nih an ngeih ciomi Cathiang cu an dihlak in an hman dih kho lo, ti cu kan fiang cang. Zungzal nunnak kongah siseh, pathian kongah siseh, an chimmi aa khat lo! Cucaah zei biaknak cathiang dah a hman, timi kongah biachahnak kan tuah a hau.
A hmanmi biachahnak kan tuahkhawhnak hnga vawlei cung biaknak kip cathiang cawnpiakmi lakah a zeidah a dik cem, tihi tha tein kan cithlat a hau

Hindu Cathiang: Hindu cathiang cawnpiakning ahcun minung cu taksa in a thih hnuah hrin-kirnak (reincarnation) nih a zulh colh, tiah an ti. Asinain minung tuanbia ah thil tha tuah mipa cu minung ah a kir than i, thilchia tuah mipa cu caw le vok hna ah an kir, timi a um bal lo. Cucaah Hindu cathiang cu a cawnpiakmi a hman ko, ti khawhnak caah tete tha a ngei lo.

Buddha Cathiang: Buddha cathiang cawnpiakning ahcun Four Noble Truths timi le zulhphung 8 (Eight-fold Noble Path) tlamting tein kan zulh khawh ahcun thlarau bantuk ah kan cang lai i, tlenglak in hngalhternak kan hmu lai, tiah an ti. Asinain an zulhphung hna cu minung nih zulhkhawh mi an si lo. Tahchunhnak ah na duhnak (desire) kha that, tiah an ti. Minung si rih chung ahcun duhnak (desire) he then awk kan tha lo.

Islam Cathiang: Muslim cathiang cu an pathian ‘Allah’ nih direct in a prophet Muhammad sinah a pekmi a si caah hi cathiang (Koran) chung ummi nawlbia vialte a zulmi cu khamh an si lai, tiah an ti. Sihmanhsehlaw sualnak kong le khamhnak kong a chimmi ah fakpi in aa kalh. Khamhnak kongah Muslim cathiang Quran  a mah le mah aa kalh. Hmun khat ah “thil tha tuahnak in khamhnak cokhawh a si” (Quran 7:6-9), tiah a ti. Cun hmun dangah mipakhat khamhnak a co ding le co lo ding cu tuahsernak lawng in siloin Allah nawl a si” (Quran 57:22), tiah a ti than fawn. Cucaah Muslim cathiang cawnpiakning in cun nun chungah khamhnak coding le coloding fiannak ngeih khawh a si lo. A mah prophet Mahammad zong khamh a si lai le si lai lo aa fiang ve lo (Quran 3:34; 46:9). Sualnak kongah Muslim cathiang Quran nih “minung sualnak cu Allah duhnak a si” (Quran 4:88; 7:6-18), tiah a ti.

Mormon cathiang: Mormon biaknak cathiang chungah khuapi min, hmunhma min le chingchiahnak tuahmi kong chimmi tampi hmuh an si. Asinain cu vialte cu nihin ah hmuh hawhmi pakhat hmanh a um lo.

 Khrihfa Cathiang: Khrihfa Baibal nih a chimmi khuapi min, hmuh hma min, le hruaitu min vialte cu nihin ah archeologist pawl nih tha tein an hmuh khawh dih. Cu lawng siloin khrihfa Baibal (Biakam Hlun) chungah rak chim ciami chungin tampi vawlei tuanbia theih awk in a tlingmi relcawk a si lo. Vawlei thohkehning le minung thohkehning fiangte zumhawktlak tein a chim khawh.  Sual thohkehning kongah Pathian duhnak ruangah siloin minung nawl ngeih lo ruangah a si, tiah a ti i cucu nifatin minung nunnak nih a hman, tiah tehte a khan. Misual hna khamhnak kongah sual ngei lo Pathian fa (mithiang) nih misual (vawlei mi vialte) caah sual ngeihthiamnak thisen a luanh piak hna, tiah a ti i cucu nihin thiang minung ngeihmi ngeihthiamnak nunphung nih a hman tiah tehte a khan ve. Khrihfa Baibal nih thih hnu pinlei nunnak kong a canpiakmi ah buaiawk pakhat hmanh a um lo: a fiang tuk. Cu lawng siloin Baibal nih a chimmi vialte le Pathian program tlinnak Jesuh chuahning, nuning, le thihning achimmi vialte kongah vawlei tuanbia (history) nih, a hman tiah, tehte a khan. Cucaah Khrihfa Baibal cu minung phuah copmi siloin Pathian nih, minung hmangin, vawlei mi vialte caah zulh awk le zumh awkah a kan pekmi hrimhrim a si.

Biadonghnak
Zei nih dah Baibal cu a phun danter?  A cunglei kan zohmi vialte fonh in kan zoh tikah khrihfa Baibal a phuntertu cu a fiang ngai ko cang. A zeidang vialte cu chia ko hna u si law, Biakam Hlun in Biakam Thar tleng lakin muhrual a tuahtu Jesuh Khrih tehte hrimhrim nihhin khrihfa kan Baibal cu biaknak dang cathiang hna lakah cungnung cem ah a chiah.
Biaknak dang cathiang nih minung le pathian pehtlaihnak kong, zungzal nunnak kong le nihin minung nunnak nih aa tinhmi kongah a phunphun in an chim cio. Cucaah vawlei kan nun chung ahhin zungzal an umnak ding hmun fimkhur tein thim thiam hi a biapi ngaingai.

Wednesday 12 November 2014

Khrihfa Baibal: Pathian Cauk Ngeihchun



(Part I)
Baibal Cu Tial le Ven A Sining Nih Pathian Cauk A Si A Langhter


Biahmaithi:
Hindu biaknak zong nih Cathiang (Vedas) an ngeih, Muslim biaknak zong nih cathiang (Quran) an ngeih i Buddha biaknak zong nih cathiang (Tipitaka) an ngeih cun kan nih khrihfa zong nih Cathiang (Bible) kan ngeih ve. Muslim nihcun Quran cu biakam pathumnak (the third testament) a si, an ti. Khrihfa Baibal zong Pathian bia a si ve ko, tiah lunglawm tein an cohlan ko. Buddhist zong nih khrihfa Baibal zongah Pathian bia aa tel ve ko, tiah an zumh. Asinain kan nih khrihfa tu nihcun biaknak dang Baibal vialte cu Pathian bia ah kan pom kho nemman hna lo. Khrihfa Baibal lawng hi Pathian bia a si, tiah kan ti. Zeitindah kan ti khawh?


                               
A.  Baibal Cauk Tial A Sining:
 Baibal hi kum 1500 chung hrawngah minung 40 nih an tialmi a si. Genesis khi 1440 BC hrawngah tial a si i Biathlam cauk khi AD 90 hrawngah tialmi a si. Cun Baibal tial a rak si lioah hin “khah…ra u, Baibal tial tuah hna u sih”, tiah thutkhawm in an tialmi a rak si lo. Vawlei ramthen pathum Africa, Europe le Asia ah; holh phunthum Hebrew, Aramaic le Greek holh in,  dirhmun le sining aa dang ciomi minung hna nih, an sinah Pathian aa phuanning cioin, an rak tialmi a si.

Cucaah Baibal cu khat le khat aa kalhmi zong a um awk a si hrim ko, tiah micheu khat nih an ti tawn. Asinain kan Baibal a thok in, a dongh tingah hin aa kalhnak pakhat hmanh a um lo. Baibal chungah hngalhhar mi cu tampi a um asinain aa kalhmi cu a um lo.  Biakam Hlun khi Biakam Thar loin a tling lo. Biakam Thar zong khi Biakam Hlun lo cun sullam ngei lo le mangbangza cauk mem a si ko hnga. Biakam Hlun a hramthok in Biakam Thar donghnak tiang, an dihlakin, Pathian le minung karlak pehtlaihnak kong an chim cio dih. Cu kong an chim cio tikah ukkhat le ukkhat karlakah aa kalhmi pakhat hmanh a um lo. Sining aa dang ciomi minung 40 nih kum 1500 chungah an tialmi cazual cu a dihlakin fonh an si tikah, mipakhat nih biatlang pakhat itar in, cauk pakhat a tialmi bantuk tein, ikalhnak zeihmanh a ngei lomi cauk pakhat BAIBAL ah a chuak ko!

B. Baibal Cauk Ven A Sining:
Baibal cu Pathian nih vawlei dongh tiang a hmun dingin thaw a chuah hnawhmi a si caah, Pathian nih nunnak pek tiangin Baibal venhim duhtu minung chankhat hnu chankhat in  aa chiah peng hna. Baibal veng himtu hna lakah biapi cem asimi hna cu catialnak capar hmanh a rak um hlan, saphaw cungah Baibal a rak um lio caan i veng himtu hna kha an si. Nihin ahcun computer thiamnak / technology a san tuk cang caah cazual pakhat tlau lo dingin kilven hi a har tuk lo. Baibal cauk hi a dihlakin khang hna sehlaw, Bible software vialte le vawlei cung computer dihlak an khangh chih dih lo ahcun, suimilam pakhat ah duhzat in print than colh, a si ko hnga. Hlan lio chan thil sining cu aa dang ngai ngai. A sunglawi tukmi Pathian nawlbia kha lungtlak le saphaw chung hna ah tial an rak si. Voikhat an kuai le an rawh sual ahcun Pathian phungbia cu a tlau thai ding a rak si. Cucaah van le vawlei sertu Pathian phungbia cu a tlau sualnak hnga lo, tha tein ven a rak si.

Cu Baibal cauk vengtu hna cu “Scribes”  tiah auh an si. Hi hna hi kan Lai Baibal Thiang ahcun ‘phungbia cawnpiaktu saya’ a timi pawl khi an si. “Scribe” hi “Sopherim” timi biafang in a ra mi a si. A sullam cu  “Baibal (Moses cauk dihlak: Genesis-Deutronomy) biafang tiang a rel/zah dihtu” tinak a si. Scribes hna rian hi a biapi taktakmi a si bantukin a har zong a har taktakmi a si fawn. An rian cu Cathiang/Baibal a rawh/tlau sualnak hnga lo copy tuah hi si. Baibal an copy tikah zulhphung pakua an ngei:

1. Cathiang tialnak caah siseh, casual temnak caah siseh, dotlat lonak zeihmanh a ngei lomi saphaw a hman lai.
2. Saphaw hmaikhat ah tlang 40 nak tlawm a tial lai lo i tlang 60 nak tam deuh a tial fawn lai lo.
3. A tialnak cahang cu a nakmi le a hriamharmi te, a si lai.
4. Cathiang a tial pah in a tialmi biafang kha aw thangin, a chim pah lai.
5. Pathian min thianghlim YHVH (Jehovah) timi tial laiah cafung par tha tein a hnawh lai i a pum dihlak ti in aa kholh lai.
6. Nawlbia cauk an tial dihin a ni 30 nakah, zoh thannak ngeih a si lai i, saphaw zual pathum ah a palhnak hmuh a si ahcun a tial ciomi cu a dih lakin hlawt i a tharthokin tial than ding.
7. A cafang, biafang, le para tthenmi vialte tha tein rel dih a si lai i, original biafang umzet he aa khat hrimhrim lai.
8. Cathiang copy mi cu biakinn chung/synagogue chung tibantuk hmun lawngah chiah a si lai.
9. Pathian bia tialnak cauk cu hrawh phung a si lo caah tha tein fim asiloah vui an rak. 


Kan Biakam Hlun cauk chung lawng ah khin YEHOVAH timi hi voi 6518 a um. Zei bantukin a kih zongah scribe hna nih ‘Yehovah’ timi biafang an tial lai ahcun an i kholh ta hrimhrim an hau. Nikhat ah voi 20/30 an i kholh caan zong a um lai. Tuchan ca kan copy bantukin cauk pakhat hei zoh i …“kan pathian…kan pathian” tiah biasau deuhin izoh i ..."kan pathian" tiah tial a ngah lo. Saphaw pakhat chungah a ummi biafang “kan pathian” timi khi tial an duh ahcun an va kal i ‘k’.. pakhat te lawng khi an zoh i “k…k…k’..tiah aw thangin an chim buin khatlei saphaw cung ahcun ‘k’ cu an va tial. A rau taktak. Cu bantukin harsa ngaiin a thla thla in an tial hnuah cahmai pakhat ah biafang 3 an palh sual ahcun, a thar in caw thah than i saphaw a ro dih hnuah a hram thok in tial than a hau. A har taktak.



Hi tlukin a harsa mi rian a si ko nain hi riantuan awk ahhin a pum aa pemi minung tampi an rak um peng zeicatiah a nungmi Pathian Bia copy tuahtu/kilvengtu kan si ti kha fiang tein an hngalh caah an lung aa lawm zungzal. An phunzai bal lo!


                                                                 Donghnak
Biaknak kip nih cathiang cu an ngeih cio tak ko. Asinain khrihfa kan Baibal bantukin tial asimi le tial si lioah ven asimi cathiang pakhat hmanh an um lo. Kan khfihfa Baibal hi cu a phun dang hrimhrim ko. Khrihfa Baibal tialtu cu minung 40 an si nain minung pakhat tialmi cauk ukkhat tlukin aa rem/aa kalh bak lo. Hi nih a fiangter mi cu minung catialtu 40 hna phenah catialtu taktak pakhat aum i cucu PATHIAN a si, tihi fiang tein a kan hmuh sak.