Thursday 19 March 2015

Barack Obama Hi Antichrist Cu A Si Maw?


Biadomhnak:

Atu kan chan minung lakah, khrihfa hna nih antichrist si khawhnak lam ngei in an hmuhmi minung lakah cheukhat hna cu  Rasia president Vladimir Putin, Princes William, Pope Francis le US president Barack Obama hna hi an si. Hi hna lakah, antichrist si khawhnak lam ttha cem ngei ah ruahmi cu US president Barack Obama hi a si. Google ah “Is Barack Obama Antichrist?” tiah va ttial law, mi tampi nih Obama antichrist ah an ruahnak a ruang phunphun na humh ko lai. Ruah awk a um ngai.


Kan va dik ah maw, kan va palh ah maw, vawlei cungah antichrist rianttuannak hngalh khawh cu khrihfa hna kan rian a si ve ko caah, atu tan cu kan nih Asia ram minung hna zong a kan dirkamhtu le ruahchannak thar a kan petu US president Obama hi, a chuak dingmi vawlei uktu bawipa, antichrist cu a si maw? Zeiruangah dah mi tampi nih a si, an ti? timi pawl kan hun zoh tti tuah hna lai. 


A. Barack Obama Antichrist A Si An Tinak A Ruang:

1. Vawlei Cung Ram Dihlak He Hoikomhnak Sertu A Si 

Vawlei cung president vialte lakah a sang bik le vawlei dihlak president bantuk in zohmi cu US president hi a si ko. Cucu United States (US) nih kan vawlei influence a tuah khawh tuk ruangah a si ko, a tawinak in chim ahcun. US ram ahhin president thlennak 44 a um cang i president rian hi minung 43 nih an ttuan cang. Hi vialte president cawlcanghning le Obama cawlcanghning hi aa dannak phun tam ngai a um. A hleice tein, ram dang he pehlaihnak policy a ngeihmi hi a phun dang ngaingai. An nih nihcun vawlei cung ram vialte he hoikomhnak ser, tthanchoter i an dihlak in US miaknak le tthanchonnak chuahtertu ah canter hi a si. Hi bantuk tinhmi a ngeih caah hlan lio US president nih an tlawn bal lonak ram tampi ah a tlawng i hoikomhnak hram a ser. 

President a ttuan chung 2009 in 2015 March thla tiang ahhin, Obama nih vawlei cung ram 48 a tlawn cang. Hi ahhin, Vatican City le West Bank a tawnnak telchih a si lo. Cun, US ram chung ummi state 50 chungah 48 a tlawn cang: a tlawn rih lomi cu South Dakota le Utah state lawng an si. Cun khuaruah har awk a si mi pakhat cu, vawlei cung ram dihlak le miphun dihlak ti awk nih, a tlangpi in, an cohlan i an tlaihchan dihmi hi a si. Obama nih a kalnak poah ah daihnak le rualremnak kong ko hi a chim zungzal. 

A rak chuak dingmi Antichrist kong chimnak ah kan hmuhmi pakhat cu, Antichrist nih vawlei uk ding in a hung chuah tikah daihnak rianttuannak in hma lak aa thawk lai, tiah fiang tein kan hmuh. (I Thes. 5:3). Hihi, Obama Antichrist ah an ruahnak a ruang pakhat a si.

2. Illuminati Pawl Chuahmi Video Nih Aa Timhmi Tlingtertu A Si

Illuminati timi cu nihin kan vawlei ah a thup in Satan caah rian a ttuanmi Lucifer bu an si. Hi hna hi an biakmi Lucifer nih hmailei kong hngalh khawhnak hna tampi a pek ve hna. Hi hna pawl nih 1871 lio ah vawlei cungah a tlung dingmi ralpi pathum kong an rak chim chung. Cu ralpi pathum hna lakah pahnih (world war I&II) cu an chimning tein, an tling cang. Hi kong hi, hmasa ka capar “ISIS Sining Nih Baibal Chimchungmi Donghnak Ralpi Mitthlam Ah A Cuanter Ngai” timi chungah ka langhter cang. 

Hi Lucifer group hna nih hin, Obama president a tlin hlan kum 15 hrawng khan America president hi video chungah minak (black) in an rak cuanter peng cang. Cu bantuk movie hna lakah cheu khat cu, Terry Crews  nih president lem a cannak “Idiocracy”, Morgan Freeman nih pathian lem a cannak “Bruce Almighty” movie etc. 

Hi bantuk in, minak pawl nih president an ttuannak movie chungah   Illuminati nih vawlei thar kalning (new world order) timi an ruah chung cangmi an langhter hna, ti a si. Illuminati pawl nih new world order an timi hi, vawlei caan thlennak khi a sawh duhmi a si. 

Cu an movie chung ah an rak chim chung bantuk tein, 2009 ah minak (black) Obama cu US president ah a hung chuak taktak. Cu lawng siloin Obama nih kan vawlei ah thlennak (thil thar) timi chuahter ding kong a chim peng fawn. Cucaah, Obama cu Lucifer bu (illuminati) pawl nih chim chungmi tlintertu ah mi tampi nih an ruahnak a si.

3. A Min Nih Khrih Dodaltu A Sinak A Langhter

Lunghrinhtu pawl nih a min kong an kherhlainak ah thil mak deuh pakhat an hmuhmi a um. A min hram “Barack” timi hi Hebrew biafang "barak" tiin a ra mi a si. A sullam hi hawih hnih in a um: “Pathian sunparnak pek (asiloah) Pathian minchiat” tinak khi a si. Atu America president, Barack Obama hi zoh tikah Pathian sunparnak peknak in, Pathian minchiatnak petu deuh in hmuh a si. Zeicatiah, zeitikhmanh ah onh bal lomi same sex marriage a onh, biaknak a kalpi ning hi pluralism a si i zei bantuk biaknak poah dirhmun khat in a hmuhmi a si (Pathian timi hi biapi ah a chia lomi a si). Nihin ni tiang, khrihfa a si tak tak le si taktak lo ah mipi an buai peng ko rih! CBS news ttialtu Mark Knoller chimning ahcun, kum 5 dengmang president a ttuan chungah voi 18 lawng aa pum rih. President Bush kha, kum 8 president a ttuan chungah voi 120 aa pum, ti a si. 

Chim duhmi cu a rianttuannak ah, Pathian sunparnak peknak lei kap si loin a mah min thatnak leikap lawng tein a cawlcang. Cucaah, “Barack” timi min sullam pahnih lak pakhat deuh “pathian minchiattu” timi he hin a nuning aa zul, tiah an ti. 

Rev. 13:1 ah, “sahrang lu cung ahcun Pathian minchiatnak min a um lai” tiah a timi kan hmuh ve. Cucaah, Obama hi a min nih a langhter bantuk in antichrist si dawh a si ko, ti zongah an ti fawn.

4. Baibal Chungah Chimchungmi Vawlei Uktu Pa He An Cawlcanghning Aa Khat

Rev. 13:5 “Sahrang cu thil lian ngan chim khawh le Pathian nihsawhnak bia chim khawhnak kaa kha pek a si” (English), tiah kan hmuh. Vawlei cung president vialte lakah hin, Obama hi bia chim thiam bik le biachim in minung lung la kho biktu pakhat a si ve. Cu lawng siloin, a mah hrimhrim nih thil liangan chimtu ka si aa ti ko. Cucu “thlennak/thilthar” ka chuahter lai a timi ah khan a si.

Kan peh lengmang ahcun a sau tuk lai caah hi vial hin ngol ko rih u si mu. Pathian miphun, Israel ram he pehtlai in, a lungput an lunghrinhnak, a pumpak biaknak dirhmun (zumhnak kong) ah an lunghrinhnak le a dang dang vialte cu, a dikthlar in kan ttial ti lai lo.

Khah, a cunglei kan langhtermi hi mi tampi nih Obama antichrist a si, an tinak a ruang pawl an si. Hi catialtu keimah pumpak nih zeitindah ka hmuh, timi cu caan kan ngeih ahcun a hnu ah kan peh tthan te lai. 

Friday 13 March 2015

"Antichrist" Timi Hi Hodah A Si? Zeibantuk Dah A Si?


Biadomhnak:

Kan Baibal ah antichrist kong hi zeimawzet a chim ko nain khuazei in dah a chuah lai i, zei miphun dah a si lai, ti cu pakhat hmanh a chim lo ai. Hi pa chuahnak kong hi, khrihfa mi hna kan caah theih a herh tukmi le a biapi tukmi a si fawn ttung. Cucaah, hi pa kong ahhin mi tampi nih an ruahnak phunphun an chim cio tawn. Hi an ruahnak an chim tawnmi pawl le an chimnak a ruang cu hnu deuh ah, fiang deuh in, kan zoh te lai. Atu tan cu Baibal nih hi pa sining kongah a chimmi tampi lak ah tlawmpal a tawinak in hun langhter kaa zuam lai.


A. Hodah A Si?

Antichrist cu, Jesuh Khrih rat-tthannak (second coming) hlan deuh teah, daihnak phawrtu bawi lem cang in, vawlei a uk i biaknak phung vialte a hrawh dih hnu ah, Pathian dirhmun ah aa chia i, a donghnak ah Jesuh khrih hrimhrim nih a kaa chung chuakmi mei in a thah te dingmi, Satan celhcihmi pa a si. Hi pa a chuah i kan vawlei ah uknak a lak khawhnak hnga, atu ah Satan nih vawlei cung ah a thli tein rianttuan a thawk cang (II Thes. 2:7)



B. Zeibantuk dah A Si? 

"Anti" timi doh (or) dotu, tinak a si. "Christ" ti cu Jesuh Khrih, tinak a si ko. Cucaah, antichrist timi cu "Jesuh Khrih dohtu" tinak khi a si ko. Antichrist  a chuahnak ding ah, zeitluk dah aa duh i zeitikset ah dah a hung chuah lai, ti cu hngalh a si rih lo. Sihmanhsehlaw ni nikhat cu a rak chuak hrimhrim lai. Cucaah, kan caah thil biapi a simi cu hi mipa (antichrist) a rak chuah tikah zeitindah a chuak cang, ti kan hngalh khawh lai, tihi a si. Phun dang in kan chim ahcun, hi pa chuahnak ding ahhin zeitindah kan vawlei pi aa sersiam, timi hngalh hi kan caah a biapi ngaingai.
Kan Baibal chung ah, antichrist a rat tik i kan hngalh khawhnak ding lam zeimawzet a kan chimhmi a um. II Thessalonians 2:3-4 3 "Ahohmanh i hlenter hna hlah u.

Zeicahtiah cu Ni cu donghnak ral thawhnak a phanh hlan le hell kal ding a simi Miá¹­halo Pa a chuah hlanah cun, a phan lai lo. Mi nih an biakmi paohpaoh le Pathian thil i an ruahmi paohpaoh kha a doh lai. Amah cu Pathian timi hna paohpaoh le biakmi hna paohpaoh hna cungah khan aa chia lai i Pathian biakinn chung hmanh ah khan a lut lai i Pathian ka si a ti lai", tiah a ti. Cun, hi pa nuning le ziaza kongah Baibal nih a chim rihmi a dang pakhat cu Revelation 13:5-8 ah a si. Tha tein hun rel tthan hmanh:

"Sahrang cu a á¹­halo tuk hringhranmi thil kha chim onh a si i thla sawm li le thla hnih chung nawlngeihnak ngeih onh a si. Pathian le Pathian min le Pathian a umnak hmun vancung khua i a ummi vialte kha a vawlh a pamh hna. Pathian mi kha doh awk le tei awkah onh a si i phun kip ram kip holh kip le mi kip cungah nawlngeihnak nawl pek a si. Vawlei cung i a ummi vialte hna nih amah cu an biak lai, sihmanhsehlaw vawlei ser hlan in nunnak cauk chung i an min á¹­ial a simi hna nih cun an bia lai lo, cu nunnak cauk cu thahmi Tuufa ta kha a si"

Baibal nih hi mipa a chuahnak ding kong he pehtlai in a chimmi tete zoh tikah, a fiang mi cu hi pa chuahnak nih hin mizapi a lauter te hna lai, tihi a si. Zeicatiah, a mah kha cungnung bik ah aa chia i mivialte cungah Pathian bantuk ah aa chia. Cucaah a hung chuah lio caan i vawlei minung vialte cu an lau dih te lai.


Martin Luther nih khan amah chan lio Roman Catholic Pope kha antichrist a si hrimhrim cang, tiah a rak ti. Zeicatiah, kha lio caan Pope cu mizapi cungah Pathian bantuk in a rak um i vancung kaiternak nawl le Hell tlakternak nawl tiang ngeitu ah a rak i chia. Cun, 1940 hrawng ah Judah miphun 6 million tluk a thattu Adolph Hitler  zong kha antichrist a si hrimhrim cang, tiah mi tampi nih an rak ruah ve. Sihmanhsehlaw cu cu chan tampi a luan cang i, mi cheu khat nih antichrist an si cang rua, tiah an rak ruahmi cu an rak si lo tinak a si.

Cucaah, antichrist cu a luan cia caan ahcun a chuak rih lo ti a fiang. Atu ahcun, atu kan chan ah a ummi minung chung in maw, asiloah kan tefa hna chan ah a chuak dingmi minung hna chung in maw, kan awrh a hau tinak a si: atu in kan hmai lei caan ahhin a chuak ding a si!
Kan theih a herhmi cu antichrist cu Pathian dirhmun i aa chiah hlan ah hoikom ttha pakhat dirhmun ah aa chia hmaisa, ti a si. Nihin Satan mui a cuangmi le mittha lo, timi hna chung hin a si lo kho men. Daihnak puanzar he mi a lem i vawlei cungpumpi nih daihnak sertu tiah an upatmi hna chung zong in a chuak kho ko.

Cucaah kan kiangkap ah kan Baibal nih a chimmi antichrist hna an um thut sual ah fiang tein kan hngalh khawh hna nak hnga, kan ttial ciami Baibal cacang nih a langhtermi a ziaza kan hun ttial piak tthan hna:

* Daihnak in milungthin lak aa thawk.
* A daihnak biakam a let.
* Mivialte nak sang deuh ah aa chia.
* Vawlei pumpi uktu a si.
* Aa porhlaw, a ruam kai.
* Pathian lei thil paoh a doh.
* Thil lianngan phunphun a chim etc.

Nihin, kan vawlei cungah hi dirhmun a tlinhtu le antichrist a si kho ding ah na ruahmi an um maw?

Note: hi kong hi sau nawn in kan peh rih lai!







Friday 6 March 2015

Kum 7 Harnak Chungah Zumtu Kan Lut Lai Maw?

Biadomhnak:

Kum 7 harnak, timi cu kan theih bal cio ko cang lai ka zumh. Sihmanhsehlaw, hi harnak hi kan nih nih kan tih awk a si maw? Kum 7 Harnak cu zeisetdah a si? Zeiruangah dah kum 7 theng a si? Zeitindah, cu hmun cun kan luat khawh lai? ti pawl hi tutan cu kan zoh tuah lai.

A. Kum 7 Harnak Cu Zeidah A Si?

Kum 7 Harnak, timi cu Israel miphun nawlngeihlonak dihternak, sualnak thianternak, sual ngeihthiamnak serpiaknak, zungzal dinnak chuahternak, prophet chim chungmi bia fehternak le a thiang bikmi hmun (pa) kha chiti thuhnak caah, Pathian nih a chiahmi zarh 70 chungah a tangmi a donghnak  zarh khat te khi a si. Daniel 9:24 holh dang Baibal zohchih in tha tein va rel.

Kum 7 Harnak, timi hi kan Baibal ah phun tampi in langhter a si. “Pathian thinhunnak” (1 Thes. 5:9; “Bawipa ni” (Is. 2:12, 13:6-9, Joel 1:15, I Thes. 5:2); “Harnak/hremnak” (Deu. 4:30, Zeph. 1:1); “Harnak nganpi” (Matt. 24:21, Daniel 12:1, Zeph. 1:15); “Jacob tefa hna harnak caan” (Jer. 30:7) tiah a phunphun auh a si.

Hi cacang vialte hi a dihlak in, pakhat hnu pakhat in fianternak caan kan ngeih lai lo caah, kum 7 harnak he pehtlai in theihfian a herh bikmi Daniel 9:24-27 karlak hi, a tawifiannak in hun chim khawh kan i zuam lai. Daniel 9: 24 ahhin, Pathian nih “na mi le nan khua thiang” caah zarh 70 chiah a si, tiah kan hmuh. Hi zarh 70 chiah a sinak a ruang cu, “An nawlngeih lonak dihternak, sualnak thianternak, sual ngeihthiamnak serpiaknak, zungzal dinnak chuahternak, prophet chim chungmi bia fehternak le a thiang bikmi hmun (pa) kha chiti thuhnak caah, a si”, tiah fiang tein kan hmuh. Hika ah, zarh 70 timi hi kum zarh (kum 7 zarkhat) in rel a si. Hihi, a tanglei a hun chimmi bia nih a fianter. Dan. 9: 25, 27 ah, “zarh 62 le zarh 7=69 a dongh tikah, Messiah cu thah a si lai” tiah kan hmuh. Baibal thiamsang pawl nih, Jerusalem biakinn sak tthan dingin nawlbia chuah a si caan thawk khan, an tuak i kum 483 a rauhnak ah Jesuh Khrih kha thah a si, tiah an fehter. Zarh 69 cu 7 in kan karh ahcun kum 483 (69 x 7 = 483) a si caah, zarh 70 timi hi zarh khat ah kum 7 (kum zarh) a si, ti cu fiang tein hngalh khawh a si.

Cucaah, Israel miphun caah chiahmi zarh 70 chungah zarh 69 cu, Jesuh Khrih thah a si ahkhan a dih cang, tinak a si. Jesuh Khrih thih bak khan, veel ngeihnak caan (grace period) aa thawk colh. Hi caan hi Khrihfabu chan (church age), Thiang Thlarau chan ti  zongah auh a si. Hi khrihfabu chan hi, mithianglawr (rapture) in a dih te lai. Khah, zarh 69 cu a dih bak in, veel ngeihnak caan nih a chan colh caah, Israel miphun caah chiahmi a zarh 70 lakah a donghnak a zarh 70th nak a tang rih, tinak a si. Hi a tangmi zarh khat hi, Kum7 Harnak, kan timi cu a si.

B. Kum 7 Harnak Chungah Zumtu Kan Lut Ve Lai Maw?

Hi kongah hin zumhning phun tampi a um sihmanhsehlaw Kum 7 Harnak Chungah Zumtu kan lut ve lai, tiah a zumtu hna nih an ngeihmi cherhchannak in, zumtu cu kan lut lai lo, titu pawl cherhchan le dirhmun hi Baibal cawnpiaknak nih a dirpi deuh ngaingai in ka hmuh. Cucaah, Kum 7 Harnak Chungah Zumtu kan lut lai lo, tiah lungfek tein ka zumh. Zeiruangah dah, ka zumh i zeibantuk cherhchannak dah ka ngeih, timi hi a tawinak in ka hun fianter tuah lai.
  
a.  Kum 7 Harnak Hlan ah Mithianglak (rapture) a si lai:

Paul nih Thessalon khuami khrihfabu sin i avoikhatnak a cakuat ah khin, Jesuh Khrih rat tthannak kong a chimh hna. Cun, an nih Jesuh cu direct in a ra colh dingah an ruah sual caah,an nih lak i micheukhat cu Jesuh pei a rat kocang lai cu, tiah riantuan zuam ti loin an um. Cu lio caan ahcun, mizeimaw nih Jesuh cu a rat diam cang ttung, tiah an rak cawnpiak ve hna ai. Cucaah, an nih Jesuh rat tthannak kong ahcun fak tuk in an rak buai. Hi an buainak hi Paul nih a theih caah,  avoi hnihnak ca a kuat tthan hna hi a si. Hi a cakuat pahnihnak ahhin, Jesuh rat tthannak kong fianternak cu tlamtling tein a ttialpiak hna. II Thesalon 2:1-12 karlak ah hin, Jesuh rat tthannak kongah a biapi taktakmi thil kan hmuh hna. Cu hna cu, a tawinak in hun zoh tuah hna u sih.


Apakhatnak ah, “donghnak ralpi a phanh le mitthalo pa a chuah hlan ahcun, a phan lai” v. 3 tiah kan hmuh. Hika ah, donghnak ralpi, timi hi Kum 7 Harnak a donghnak leiah a chuakte dingmi, Armegadon ralpi (Rev. 16:) khi a si, tiah zumh a si. Cun, mitthalo pa timi hi cu Kum 7 Harnak chungah hruaitu a si dingmi, Antichrist a si.

Pahnihnak ah, “Mithalo pa rianttuannak cu, a thli in aa thok cang sihmanhsehlaw a khamtu kha tthial a si hlanah cun a chuak kho rih lai lo” v. 7 tiah kan hmuh. Hika ah, mitthalo pa khamtu timi hi Greek ahcun neutral gender (nu zong si lo, pa zong si lo) in ttial a si. Kan Baibal chungah Thiang Thlarau hi neutral gender in langhter a si ve caah hihi Thiang Thlarau a si, tiah zumh a si. Cu lawng siloin, Satan chuak kholo in, a kham khotu ding thil dang zeihmanh an um lo: Thiang Thlarau lawnglawng a si. Cucaah, hika zawn i a khamtu timi hi nihin ThiangThlarau chan Thlarau hi a si, tihi alawk a tha lo. Hi a khamtu tthial a si hlan cu… tthial, timi hi thianglawr (rapture) timi cu a si.

Khah, a cunglei kan langhtermi pawl hi hun zohfiah ta hmanh u sih. Antichrist a chuak lai i, a mah nihcun vawlei cungah uknak a lak te lai. Amah nih vawlei a uk lio caan chungah cun, Kum 7 Harnak, timi hi a chuak ding a si. Sihmanhsehlaw Antichrist chuak kholo in, atlaitu cu Thiang Thlarau chan zumtu hna chungah aa celhcihmi Thiang Thlarau hi a si. Hi Thiang Thlarau chan hi, zumtu vialte van ah laknak (thianglawr/rapture) in a dih lai. Cu hnu lawngah cun, Antichrist nih vawlei ah uknak a lak te lai, timi hi II Thesalon 2: chungah fiang tein kan hmuhmi a si. Cucaah, Kum 7 Harnak chungah cun zumtu (khrihfabu) cu kan lut lai lo. Zeicatiah kum 7 harnak a phanh ahcun, kan nih (khrihfabu chan zumtu) cu van ah lak kan si diam cang lai ( I Thes. 4:13-18, I Cor.15:51-53).

b. Zumtu Cu Pathian Thinhunnak In Khamh Kan Si:
  
Kan Baibal chung hmun tampi ah, Pathian thinhunnak chungin khamh kan sinak le kan si lainak kong kan hmuh. Tahchunhnak Rome 5:9 ahcun “Thisen thawng in Pathian he remter kan si ahcun, zeitlukdah a mah nihcun Pathian thinhunnak chung cun a kan khamh chinchin lai”, tiah kan hmuh. Hi Baibal cacang hi ttha tein va rel law, zumhnak thawngin kan comi khamhnak leng ah, a ra dingmi (a dang) Pathian thinhunnak chung zong in, kamh dingin bia a kan kamh chihmi na hmuh lai. Hika zawn ah thinhunnak timi hi, mirang Baibal ahcun wrath tiah a ti. Hi wrath timi biafang hi, Biathlam 4-18 karlak kan zoh tikah, Kum 7 Harnak he pehtlai in voitampi hmanmi a si. Cucaah, Jesuh Khrih khamhtu le a bawi taktak ah aa cohlan cangmi hna caah cun Kum 7 Harnak cu tih awk a si ti lo. Zeicatiah, cu harnak chung cun, kan khamh hna lai, tiah Pathian nih bia a kamh cang. “kan nih cu Pathian thinhunnak in awkah thim kan si lo…” (II Thes. 5:9).


Hi ca a reltu hna lakah, hi kum 7 harnak kongah a rel lio ah tihnak in a khatmi le kaa tel ve ko lai, tiah a ruatmi, khamhnak a co rih lomi, nan um sual ahcun hi harnak chungin na luat khawhnak hnga, nihin hi na caan ttha a si. Jesuh zumhnak thawng lawng in luat khawh a si!



 May God Bless You (:-